Khliehriat Naitung 3: Ki hynriew ngut ki dkhot kiba dei ruh ki nongialam ba radbah jong ka party National People’s Party na Sutnga-Saipung Constituency, hynnin ka sngi saitjaiñ ki la pynbna ba ki la mih noh na ka party NPP, ki la ong ba ka jingmih jong ki ka dei namar ba ki nongialam ka party na Shillong kim kheiñ snep ïa ki bad kyntait ban ai tiket ïa u bah Hopeful Bamon, u MLA ba rim jong ka Sutnga-Saipung Constituency, na ka liang ki dkhot kiba la mih ki la pynshai kham bniah shuh shuh halor ka jingmih noh jongki na ka NPP.
U bah Thijlang Shyrmang, uba la ju bat kum u President jong ka NPP 5-Sutnga Saipung Constituency u la ïathuh bad ong ba “Ha ka jingshisha ngam pat don jingmut eh ban mih na ka party (NPP) namar lah jan don san snem na la long u President jong ka NPP-Block Saipung Sutnga constituency bad hapoh kine ki snem ngi lah ïa trei shitom bha kumno ban pynkhlaiñ ïaka party, ngi la dep pynlong ïa ka jingialang ha u bnai rymphang namar la bthah ïa ngi da ki heh NPP na Shillong (NPP-State Level) ba ngin pynlong jingialang ba ngin jied ne phah noh ïa ka kyrteng jong u candidate u ban iakhun na ka bynta ka election ha u 2023, kumta ha kata ka jingialang da kawei ka jingmut ryngkat bad u paidbah uba bun ngi la shim ïa ka rai ban phah ïa ka kyrteng jong u bah Hopeful Bamon, uba dei ruh u MLA ba rim jong ka Sutnga- Saipung Constituency, uba la wanrah nyngkong ruh ïa ka party NPP hangne ha constituency, kumta ngi la leh kumba la bthah bad ngi la leit ban aiti (submit) ïa ka kyrteng sha u bah Sniawbhalang Dhar, sha u Prestone Tyngsong bad sha u Connrad Sangma, ngi la ai ruh ïa ki kot ki sla ba donkam ha kaba ïadei bad kata kat kum ka jingbthah jong ki ïa ngi ban wad candidate, hynrei hadien katto katne por, kane ka kong Santa Mary Shylla ka la leit ban rung sha ka party NPP bad ka la pan tiket, te hadien kane ki heh ka NPP ki la khot biang ïa ngi shatei sha Shillong na ka bynta kata ka tiket, kumta ha ka jingiakynduh jong ngi ïa u bah Prestone Tyngsong bad u bah Sñiawbhalang Dhar, kine ki la ong ïa ngi ba ki la iapyrkhat bha ba ïa kane ka kam ban ai ka tiket, te ngi hap ai noh sha ka kong Santa Mary Shylla, namar ba u bah Hopeful Bamon u duna pisa katba ka kong Santa Mary Shylla pat ka dei kaba bun pisa, te tharai kan wanrah jing jop, ki la ong, bad nga pat kum u President jong ka Block na Sutnga Block NPP nga la iasaid bad nga la ïeng pyrshah ïa kata ka rai jong ki, nga ong ba kam shong eh ha ka pisa hynrei ka shong ha ka jingieid jong u paidbah, namar kata ka dei ka rukom hapoh Sutnga Saipung Constituency ba ka jingshisha hi ka dei ba ka jingjop kam da shong eh ha ka jingdon pisa”
Ha kajuh ka por, u bah T.Shyrmang uba na shnong Sutnga, u la ïathuh ba ka jingmih jongki na ka party ka long ruh halor ka nongrim ba kim sngewtynnad ban shu ai tiket ïa kiba na bar ka constituency, namar ka kong Santa Mary Shylla kam dei ka briew kiba na ka Sautnga-Saipung Constituency “Haba ïakren bad ki heh ka NPP kiba don ha Shillong, u bah Sñiawbhalang Dhar u la ong bad pynksan ba na Bhoi ruh ki phah candidate da u bym don vote ha ka constituency ba u iakhun, katba u jop, kumjuh ruh na Mawhati, na Umroi, na Nongkrem ruh kin pynieng da u bah Dasakhiat Lamare bad ong ba kin jop beit, To, ïa kata te ka don ka jingiapher, kiwei bad ma ngi, namar ngi te shane kam long kumta, ngi te ban dei ki candidate kiba na bar constituency te ka long kaba eh than” la bynrap u bah Shyrmang bad ïathuh ba u la kren ruh da kaba shai ha khmat u bah Prestone Tyngsaong bad u bah Sñiawbhalang Dhar da kaba ong ba “Lada phi kwah ba ka party NPP kan kan jop suk ha ka election ha u snem 2023 na Sutnga- Saipung Constituency te dei ban ai tiket beit da u candidate uba ngi mon, namar ngi thep vote ma ngi te, ym dei ba thep vote ka tiket namar ngi sngewthuh ba lada u ioh u bah Hopeful Bamon un jop beit, ïa kane la tikna, hynrei kin shym la sngap satia bad ki la ong beit ba ki la dep ai ïa ka tiket sha ka kong Santa Mary Shylla, ha ka jingshisha lada kim i mon ban ai tiket ïa u bah H.bamon hyrei ngi kwah ban ai noh da uno uno uba dei napoh ka constituency hi hynrei ban shu ai ïa kiba na bar te ngim sngewtynnad” pynpaw shuh shuh ki hynriew ngut ki dkhot ba mih seng.
Ki nongialam ka NPP na Sutnga Saipung Constituency kiba la mih noh na ka seng ki kynthup u Block President 5-Sutnga-Saipung Constituency, u bah Thijlang Shyrmang, U Treasurer jong ka 5-Sutnga Saipung Constituency, u bah Puraimon Bareh, Secretary NPP Youth Wing Sutnga Unit, u bah Ïoo-wan Shyrmang, u President NPP Youth Wing Sutnga Unit, u bah Pynbait Sutnga, u President NPP Sutnga- Narwan Unit, u bah Never Lamurong bad u Vice President Sutnga Unit, u bah Alienslyroy Bamon.
