Da ka jingïakop mareh Marathon pynlong ka ophis u SP-EJHD kum ka jingrakhe ïa ka National Unity Day

Khliehriat, Risaw 31: Kum shibynta ka jingrakhe ïa ka National Unity Day, ka ophis jong u Superintendent of Police, East Jaiñtia Hills District mynta ka sngi ka la pynlong da ka jingïakop mareh marathon ba la shim bynta da ki shynrang bad kynthei ha kaba ïa ka jingïamareh la sdang na ophis jong u Superintendent of Police, East Jaiñtia Hills District sha shnong Rymbai da kaba mareh lyngba ruh na ka jaka ba don ka ophis ba rim jong u Deputy Commissioner bad phai biang pat sha ophis u SP.
Ïa katei ka jingmareh kaba 10 kilo mitar la pyllait lama da u Superintendent of Police, East Jaiñtia Hills District, u Vikash Kumar, IPS, ba la ïa don ryngkat lang ruh u Additional Superintendent of Police, East Jaiñtia Hills District, u bah Baniateilang Deingngan, MPS, u Assistant Superintendent of Police, East Jaiñtia Hills District, u Saurav Kumar Saini, IPS bad kiwei kiwei ki heh pulit kiba na ka district.
Ha kane ka jingïa mareh la iohi ïa ka mynsiem ba shit rhem jong baroh kiba ïa shim bynta bad kynthei bad shynrang kynthup ki khynnah kiba naduh 10 snem kyrta haduh ki rangbah kiba la 50 snem sha neng ka kyrta.
Ha shwa ban sdang ïa ka jingmareh baroh kynthup naduh ki heh pulit ki la shim ïa ki kyntien jingkular ne ka pledge ba la ïalam da u heh pulit u Assistant Superintendent of Police, East Jaiñtia Hills District, u Saurav Kumar Saini, IPS, ki kyntien kular ne pledge ha kaban kyntiew ïa ka mynsiem jong ka jingïatylli bad ka mynsiem ban ïada ïala ka ri.
Ïa kiba jop ha katei ka jingïamareh marathon la ai khusnam da ka pisa, ki medal, trophy bad syrnot, kiba jop ha ka nam lah duh ki ioh ïa ka khung pisa kaba T 10000/- (shiphew hajar tyngka), kiba long ba ar ki ioh T.7000/- (hynniew hajar tyngka) bad kiba long ba lai ki ioh T5000/- (san hajar tyngka).
La ai ruh ïa ki prize kiba kyrpang sha kito kiba la rangbah bha kynthei bad shynrang bad ba khynnah tam kiba la wan ban ïa shim bynta ha kane ka marathon.
Na ka liang ki shynrang uba la rah ïa ka nam lah duh u dei u samla Knerlang Phawa, uba wan ba ar u dei u samla Mebansainborlang Pathaw bad uba wan ba lai dei u samla Daiohi Mitre Pale.
Na ka liang ki kynthei pat, kaba ioh ïa ka nam lah duh ka dei ka samla Jidalin Tympuin, kaba wan ba ar ka dei ka Phyrnai Kyndait bad kaba wan ba lai ka dei ka Pinky Lamurong.
Ïa ki prize kiba kyrpang pat la khur da u hep rit Meban Sumer bad u Peter Sutong kiba dei ki nongshim bynta kiba khynnah tam, kiwei pat ki kynthup ka kong Rimika Pyrtuh bad u bah Lam Shadap kiba dei ki nong shimbynta kiba rangbah tam.
Kane ka jingïa mareh Run for Unity la pynbna da ka National Unity Day (Rastiya Ekta Diwas), kaba dei ruh shibynta ka jingrakhe ïa ka sngikha jong u Sardar Vallabhbhai Patel, uba ju tip kum u Iron Man of India, kumjuh ruh ka jingthmu jong kane ka jingïamareh ka dei ruh ban kyntiew ïa ka jingbit jingbiang ha ka jinglong ka met ka phad, ban kyntiew ïa ka jingïatylli kum ki nongshong shnong jong ka ri India.