Phah tohkit u MP ïa u DC ba bun palat ki trok ba ïeng pathar ha shilynter ka surokbah ha Ri-Bhoi

Shillong, Risaw 25: U Member of Parliament (MP) jong ka VPP na Shillong Constituency u Dr Ricky AJ Syngkon u la kyntu ïa u Deputy Commissioner ka Ri-Bhoi District ban tohkit halor ka jingpynïeng kali pathar bad khlem ïohbor ki trok ha shilynter jong ka National Highway 6, kyrpang hapdeng ka surok 14th Mile shaduh Jorabat.
“Halor kane, da kaba burom nga kyrpad ïa ka ophis jong phi ban tohkit ïa ka nongrim jong ka daw kaba la pynlong ïa kine ki trok ba kin pynïeng ha shilynter ka surokbah, naba ïoh lehse ka dei na ka jingduna ki jaka pynïeng kali, ki jingslem ha ka ban pynhab bad kyntiew ïa ki mar ne ka jingbym biang ki bor pulit,” ong u Bah Syngkon ha ka shithi ba la phah ha ka sngi Saitjaiñ.
U Dr Syngkon u la pynpaw ruh ba kane ka kam kaba la neh ka la wanrah ïa ka jingeh khamtam ïa ka jingdheng kali, ka jingïaid beit jong ki kali khlem shah pynthut, bad ka long ruh ka jingma kaba khraw ïa kiba ïaid ha ki surok bad kumjuh ruh ïa kiba ïaid ha ki lynti.
U la kdew ruh ba ka surok ba la shna na ka bynta ban ïaid artylli ki kali ka la shah pynrit haduh ba mynta ka la long ban ïaid tang kawei kali na ka daw ba la shu ieh ïa ki trok harud surok, ha kaba kane ka la long ka daw jong ka jingdheng kali kaba jrong bad neh slem bad ka wanrah ruh ka jingma kaba khraw, khamtam ha ka por ba don ka jingbym lah ban ïohi bha ïa ka surok ne na ka daw ka jingthut ka jinglong ka suiñbneng.
U Dr. Syngkon u la kyrpad ïa u deputy commissioner ban pyrkhing bha ïa ki kam pynïeng kali ba khlem ïohbor harud surok bad kiba don bynta ruh ban ïeng ha shi lynter ka surok bah bad kiba dei ruh ban khmih da ka National Highways Authority of India (NHAI), khamtam ki trok kiba pynïeng jong kane ka kompeni kiba pynhab mar ha ki thaiñ jong ka NH-6 ha Ri-Bhoi District.
U MP u la banjur ïa ka jingdonkam kaba kyrkieh ban tuklar khnang ban wanrah bad pynlong biang ïa ka surok kaba kylluid bad ban ai ka jingïada ïa ki paidbah.
“Kane ka surokbah ka long kaba kongsan naba kadei ka khyrdop ka kit ka bah na ka bynta jong kiwei pat ki jylla kane ka thaiñ shatei lammihngi,” u la ong.