Da ka jingïalam u Capt. Williamson, la ïoh ïa ka jylla Meghalaya khlem jingumsnam : Lamphang

Tura, Risaw 25: Kum ka dak ka jingrakhe ïa ka lyngkhuh sngi khlad ba 35 snem u Myntri Rangbah ba nyngkong ka jylla u (L) Capt. Williamson A. Sangma, na ka liang ki bahaïing ha sem, ki riew sain pyrthei bad khamtam ka ophis treikam jong u Lamphang ka Ïingdorbar Thaw aiñ ka jylla ka la rakhe ïa kane ka sngi da ka prokram ba la pynlong ha Tura ha ka sngi Saitjaiñ.
Ha kane ka program la kynmaw burom ïa ka jingïohi jngai ïa ki jinglong nongïalam kiba la wanrah ïa ka nongrim jong ka jingithuh ïa ka jylla bad ki jingïoh ia la ka jong ka jylla da kaba suk ba saiñ khlem jingïaumsnam.
Kum shi bynta na kane ka jingkynmaw burom, la pynlait ruh ïa ka kot kaba la ai kyrteng “Capt. Williamson A. Sangma – Architect of Meghalaya” ba la thoh da u Dr. Andrew Simons, Commissioner and Secretary ka Meghalaya Legislative Assembly, kaba la pynlait ruh da u Lamphang ka Ïing Dorbar Thaw aiñ ka jylla u Thomas A. Sangma, uba la shim bynta kum u kongsan.
Ha kane ka prokram sah jingkynmaw la sakhi da ka jingdonlang u Myntri ka sorkar u Brening Sangma, u Secretary ka Meghalaya Legislative Assembly u Malthus S. Sangma, nangta ki ophisar ka Assembly Secretariat, ki dkhot ka ïing ka sem u Capt. Sangma, ki samla pule college bad kiwei kiba la shah khot sngewbha.
Ha ka jingkren u Lamphang ka Ïing Dorbar Thaw aiñ ka jylla u la ïathuh shaphang ka jingïadei ba jan jong u shimet bad une u nongïalam uba la khlad noh, u la pynkynmaw ruh halor ki jingïoh mad jong u ha ka por ba ula synran ïa u Capt. Sangma ha kylleng ki jaka jong ka jylla ha ka por ba u dang long kum u Myntri Rangbah ka jylla. U la kren biria ruh haba kynmaw kumno ba u Capt. Sangma un pynkyndit ïa u ha ki por ba ju ïa leit jingleit sha ki jaka ba jngai, ha kaba u shait thap bad tied na ka khlieh ban pynkyndit ïa u haba dang ïoh thiah.
U Thomas A. Sangma u la banjur ïa ki jingangnud jong u Capt. Sangma ban kyntiew ïa ki jingkordor ki kam synshar paidbah bad ka jingsuk. U la kdew da kaba ïathuh ruh ba la ïoh ïa ka jylla Meghalaya khlem da don ka jingïaumsnam, ba la ïalam da u Capt. Sangma bad ka jingngeit kaba ong “violence begets violence.”
U Lamphang u la batai ruh ïa u kum uwei na ki nongïalam ba donburom bha ha jylla Meghalaya, khamtam eh ha ka saiñ hima sima, uba hapoh ka jingïalam ha ka por ba ïakhih ïoh jylla la jong u la pyni ïa ka jinglong ba shlur, ka jingïatylli bad ka rukom pynïaid ïa ki kam na ka bynta ka synshar khaddar.
U la banjur ruh shuh shuh da kaba ïaroh ïa ka bynta kaba khraw jong u Capt. Sangma ban wanrah ka jingïalong kawei hapdeng ki Khasi, Jaiñtia, bad riewlum Garo. “Kadei namar ka jinglong nongïalam bakhraw jong u ba kine ki 3 riewlum kiba kren ruh la ki jong ki ktien ki ïaineh ha ka jingïalong kawei,” u la ong da kaba bynrap ïa ka jinglong ba kongsan jong ka jingïasngewthuh jingmut bad ka jingïashim rai lang kumba la hikai da u Capt. Sangma.
Haba kren shaphang ka kot, u nongthoh u Dr. Andrew Simons u la pynpaw ka jingai khublei bad ai burom ïa ka ïing ka sem jong u Capt. Sangma bad sha ka Library ka Meghalaya Legislative Assembly ba la pynïoh ïa ki tiar bad ki jinglum thup kiba kordor. U la kynthoh da kaba ong ba watla u Capt. Sangma la kynmaw da baroh, ki jingthoh kiba kongsan jong ka jingim jong u bad ki jingnoh synniang ki ïaineh, ki pynkhih ïa ka jingim jong u ban shlur ban shim ïa kane ka kam.
“Kane ka jingsdang kan long ka lad jingtip ïa ki pateng ban wan jong ki samla, kan ïarap ba kin sngewthuh shaphang ka jingïakhih jylla la jong, ka jinglong nongïalam u Capt. Sangma, bad ki rukom treikam bad pyrkhat kam kiba ïadei bad ka jingïakhih khlem da umsnam,” ong u Dr. Simons. U la bynrap ruh ba watla um pat ju ïakynduh ïa u Capt. Sangma shimet, u la ïai bat pat ïa ka jinglong nongïalam bad ki rukom ïaid lynti jong u kum u riew saiñ pyrthei ba shemphang.
Ka prokram ka la kut da ka jingai burom sha u Capt. Williamson A. Sangma, uba don ka jingpyrkhat na ka bynta ka jingsuk, ka jingïalong kawei bad ka synshar khaddar kaba bha ha kaba kane kan bteng ban ai mynsiem ïa ka jylla ba mynta bad ïa ki pateng ban wan.