Kynnoh ki paidbah ka Mynsngat ba don ka jyrsieh bamsap ha ka skhim SBM, ujor da ka ejahar

Jowai, Risaw, 25: Ki nongshong shnong ka shnong Mynsngat, West Jaiñtia Hills District ha ka sngi Saitjaiñ ki la ujor da ka ejahar ha Nartiang Police Station hapoh ka jingïalam u Bah Phresmi Suting pyrshah ïa ka tnat Public Health Engineering (PHE) RWS Division Jowai bad ïa ki Chairman, Secretary VWSC ka shnong Mynsngat halor ka jingkynnoh ba ka don ka jyrsieh bamsap ba la pyntrei ïa ka Swachh Bharat Mission (SBM)
Katkum ka jubab RTI ba la ïoh da ki nongujor na ka ophis PHE RWS Division, Jowai ki don haduh 164 tylli ki longïing kiba la ïoh myntoi na kane ka skhim Swachh Bharat Mission, hynrei ki shu paw tang ka kyrteng khlem da ïoh pdiang ïa ka pisa lane ka jingpyntrei kumba la mang da ka tnat PHE RWS Division Jowai. ïa ka Work Order ladep ban pyllait naduh ka 6 tarik, Nailur, 2024 bad ki nongïoh jingmyntoi kim tip eiei tad ynda la ïoh ïa ki jubab RTI na ka ophis PHE RWS Division Jowai kin sa ïoh jingtip ba ka kyrteng jong ki ka mih katba ka pisa kim ïoh satia, la ong u kyrwoh ba la phah da ka Kong Phresmi Suting.
Halor kane, ki la dawa na ki bor ka aiñ ban kem bad pynshitom da kaba tyngeh ïa kiba donkti ban pyndonkam bakla ïa ka pisa paitbah bad dawa ruh ba kiba donkti ki dei ruh ban shah pynsaja katkum ka aiñ.
La pynsngew ba ka skhim Swachh Bharat Mission ka dei ka mishon ba ka sorkar ka la buh ban ai ïa ki paiñkhana ha manla ki thliew ïing baduk ban rat dyngkhong ïa ka jingleit paiñkhana pathar hynrei ka dap tang da ka jing bamsap. “Kumno kim lehraiñ ban bam ïa ka hok u duk u suk, la kynnoh ki nongujor.
Ki la ong ba ka skhim Swachh Bharat Mission ka dei ban long ka rukom treikam kaba pynbit pynbiang ïa ki longïing baduk da kaba ai paiñkhana ban rat dyngkhong ïa ka jingleit paiñkhana pathar. Hynrei mynta kane ka skhim ka la kylla long tang ka lad ai bam ïa kiba donkti hapoh ka jingtreikam jong ka tnad PHE RWS Division Jowai bad ka VWSC Mynsngat.
“Kane ka long ka jingbymman kaba khlem da lehraiñ, ngi dawa na ki bor ka aiñ ba kin kem bad pynshitom katkum ka aiñ ïa baroh kiba donkti ha kane ka jingbamsap kaba ktah ïa ka hok jong u paidbah uba duk uba suk,” ki la ong shuh shuh.
Ka Kong Phresmi Suting ka la pynpaw ruh ba kim ym shong klikti bad ïai pyrshang ban buddien haduh ban da ïoh ïa ka hok jong ki bad kumjuh ïa ka hok jong ki paidbah baroh.