Nongstoiñ, Naitung, 2: Ka long kaei kaei kaba pynlyngngoh ïa kiba bun ba lang kiba tip ïa ka jingshisha, ba ki don ki Govt L.P Skul ha West Khasi Hills District kiba ka sorkar kam pat thung nonghikai la ar snem kynthih. Kawei na kitei ki skul ka dei ka Mawdiangsnam Govt L.P.Skul kaba don ha ki thaiñ Langpih.
Ha kaba ïadei bad katei ka Govt L.P.Skul, u bah R.Baney u nonghikai jong katei ka skul u ba la shongthait na ka kam naduh u snem 2020, u la ïathuh ba watla u la shongthait, hynrei ïa baroh ki kam kiba ïadei bad katei ka skul, u dang hap ban peit ban khmih hi.
Utei u rangbah u la ong ruh ba katkum ka jingtip jong u hadien ba u la shongthait na ka kam, ka sorkar ka la thung ïa u nonghikai ha katei ka skul. Hynrei um shym la wan shimti ïa ka kam, namar ba u leit hikai ha kawei pat ka Govt L.P.Skul kumta katei ka skul kam don nonghikai satia.
U la ong ruh ba na ka liang jong u bad ki dkhot ka Managing Committee, ki la phah da ka jingthoh sha ka ophis jong u Sub Divisional of School Education Officer, hynrei haba leit ïakynduh ïa kitei ki ophisar ka jubab ka long ba u Director of School na Shillong um treh satia ban thung da uwei pat u nonghikai ha katei ka skul.
U la buh ruh ka jingkylli da kaba ong hato kaei ka daw kaba pynlong ïa u Director ba um kwah ban thung da uwei pat, haba u nonghikai ba la dep thung um treh ban leit shimti ïa ka kam. Kawei pat ka jingkylli ka long hato utei u nonghikai ba la dep thung u don jingïadei aïu bad ki Myntri sorkar kat haduh ba un ïoh tulop sorkar na ki ar tylli ki skul tang marwei. Namar na ka skul ba u leit shimti ïa ka kam lada um ïoh tulop hato u nud ban shu leit hikai ei.
Lane hato kumba u Myntri sorkar u ba peit ïa ka pule puthi ha ka jylla u kubur ba ki don ki nonghikai Government kiba ai kontrak ïa ka kam ha kiwei, imat utei u nonghikai u ba la thung ha Mawdiangsnam Govt L.P Skul, u shu leit shim kontrak ïa katei kawei pat ka skul tang namar u kham suk bad ban kham ïoh bun.
