Lyngba ka Meghalaya Migration Act, bun ki bar jylla ki la ïoh labour license lypa na ka Sorkar: CEM

Shillong, Risaw 23: U Chief Executive Member (CEM) ka KHADC Bah Winston Tony Lyngdoh ha ka Dorbar Tlang ka KHADC ula ïathuh ba ka Sorkar jylla ka ai Labour Licence ïa ki nongbylla bar jylla wat ïa ki bym pat rung shapoh ka jylla Meghalaya bad ïa kane kine ki bar jylla ha shwa ba kin wan ban bylla sha ka jylla lyngba ka online ki la lah ban ïoh ïa ka Labour License kaba long ruh hadien ba ka sorkar ka la wanrah ïa ka Meghalaya Migration Act.
Ïa kane u la ong haba jubab ïa ka Motion halor ka jingai ïa ka Non-Tribal Employee Clearance Certificate (NTECC), ha kaba u la ong, “Nga la ïohi ruh ba ki nongbylla bar jylla ki bym pat ïoh trei ha Meghalaya, ki la dep ïoh ïa ka labour license na ka Sorkar Jylla. Kane ka long kaei kaei kaba sngewdiaw mynsiem. Kumno u briew un ïoh lypa ïa ka Labour License haba u dang don shabar ka Jylla bad kane ki la aplai lyngba ka online ïa ki license bylla jong ki.
U la ïathuh ruh ba ïa ka NTECC la pynmih katkum ka ain jong ka United Khasi-Jaintia Trading by Non-Tribal Regulation, 1954 kaba dei hi jong ka Council.
U la pynpaw ruh ba ka Council ka la ai ïa ka NTECC naduh u snem 2020 hadien ka jingïakren bad ka rai jong ka Executive Committee (EC) kaba la long ha ka 4 tarik Jylliew 2020.
U la ïathuh, “Ka rai jong ngi ban ai ïa ka NTECC ka long hadien ba ngi la ïohi bad ngi la bishar markhmat ïa u nongbylla bar Jylla uba aplai Labour License. Ngi ai ïa ka slip ban ai por ïa ki nongtrei bar Jylla ban pynbiang ïa ki kot ki sla kum ka EPIC, Aadhaar, Residential Certificate, Passbook Account, bad kiwei kiwei ki kot ba donkam hapoh 15 sngi.”
“Kumba la dep ban ïathuh ba u nongbylla bar Jylla u lah ban ïoh da kaba suk ïa ka labour licence na ka Sorkar Jylla watla u dang don shabar ka Jylla. Ka KHADC ka la rai ban pyndonkam ïa kane ka kyndon da kaba pynlong ïa ki jingjurip, ki jingpeit bad bishar bniah markhmat bad ki nong aplai Labour License. Ka jingpyntreikam ïa ka NTECC ka dang ïaid shakhmat, bad ngi la bthah ïa ki ophisar ban ithuh ïa ki nongtrei bar jylla khnang ban ai ïa ki syrnod ba donkam” ula bynrap.
U la ong, “ïa ka KHADC la ai bor lyngba ka Second Proviso Sub-section 2 jong ka Section 3 ban ai ïa ka NTECC. Watla ka Meghalaya Migration Act ka la shim noh ïa ka bor jong ngi ban ai ïa ki labour clearance certificate, hynrei ngi sngewthuh ba ka don ka jingïatyngkhuh bad kane ka aiñ, hynrei ngi sngewthuh ruh ba kine ki nongtrei bar Jylla ki trei hapoh ka jaka Sixth Schedule namar kata ka District Council ka dang don ïa ka bor ha kaba ïadei bad ka jingai ia ki labour license da kaba kyrpad ruh ia ka sorkar ba ha shwa ba kan ai ïa ki license kadei ban pan shwa ïa ka license na ka KHADC.”