Nongstoiñ, Risaw 22: Namar ka jingtrei torti jong u kontraktor ïa ka surok PMGSY na Nongkynjang-Byrki haduh Umdohlun kaba jrong kumba 13 kilomitar tam, ki nongïalam ka FKJGP Byrki area unit ha ka sngi palei jong ka taïew ba la dep ki la leit ban jurip bad ki la lap ba ka jingtrei ka la long kaba troti haduh katta.
Ki nongïalam ka seng ha ka sngi balang ka 22 tarik Risaw ha ka jingsynran lang jong ki nongïalam jong ka FKJGP West Khasi Hills, ki la leit ban ïakynduh ïa u bah D.Ranee Executive Engineer ka tnad PWD Nongstoiñ Division, ban pynsngew bad kyrpad ïu ba un bthah ïa u kontraktor ba u dei ban trei thik katkum ki kyndon ba la buh da ka sorkar.
U bah F.Kharhari president bad bah P.Lyngdoh Nonglait secretary ka seng, haba ïakren bad ki lad pathai khubor hadien ba ki la mih na ka kamra treikam jong utei u ophisar, ki la ong ba ha katei ka jingleit ïakynduh jong ki la aiti ruh da ka jingthoh ha u Executive Engineer, ha kaba u la kular ba un shimkhia ïa katei ka kam bad un sa phah noh kham kloi ïa ki briew napoh ka ophis ba kin leit ban jurip ïa katei ka surok.
Ki nongïalam ka seng ki la ong ruh ba lada ka tnad PWD kam shimkhia, katei ka surok kan ym neh satia wat tang shi snem ruh bad lada ka surok ka jot ka pra, ki paitbah ka thaiñ bad ki nongleit nong wan kin shem shitom bad kin mad shibun ki jingeh ha ka kit ka bah, khamtam lada don ki nongshong shnong kiba pang ba shitom kiba don kam ban leit phah sumar ha ki hospital.
