Nongstoiñ, Risaw 20: Kum ka jingai mynsiem ïa ki riewngeit jong ka balang Presbyterian Umyiap kaba hap ha ka District Umyiap Laitkseh Presbytery, ki nongkitkam ba hakhmat jong ka Jingïaseng Samla KJP Synod Sepngi ba kynthup ïa ki Pastor bad kiwei kiwei, ki la wan ban ïakynduh ïa ki nongkitkam jong ka Balang Presbyterian Umyiap ban ïa phylliew jingmut bad ai mynsiem shuwa ba ka Balang ka pdiang ïa ka Jingïaseng Samla jong ka KJP Synod Sepngi ha u snem 2027.
Ha katei ka sngi ka Balang ka la khot lang ruh ïa ki Pastor bad ki nongkitkam jong ka Laitklseh Presbytery ba la synran lang ruh da u Pastor D.R.Marngar bad Pastor K.K.Kharsyntiew kiba dei napoh ka Umyiap District.
Ïa katei ka jingïakynduh lang la pynlong ha Ïingmane jong ka Balang Presbyterian Umyiap, ha kaba la pynïaid da u Rev H.Lyngkhoi Chairman ka Jingïaseng Samla KJP Synod Sepngi.
Shuwa ban ïoh ïa ka jingïaphylliew jingmut bad pynsngew ïa ki mat ba ka Balang ka la pynkhreh lyngba ki Committee bapher bapher, ba kynthup ïa ka Reception Committee, Development Committee Pandal Cum Sitting Arrangement & Sound System Committee, Prayer-Cum Singing & Sacrament Committee, Refreshment Committee, Volunteer Cum Traffic & Parking lot Committee bad ka Fund Raising Committee la pdiang sngewbha ïa baroh kiba wan da u Tymmenbasan T.Kharbani.
Ha katei ka sngi la pynsngew ïa ka kaiphod jong ka jingpynkhreh jong ka Balang ban pdiang ïa ka Jingïaseng Samla KJP Synod Sepngi. La ïoh ban ïaphylliew jingmut bad ïathir sani halor ki jingdom kam baroh kiba ka Committee pynkhreh Synod jong ka Balang ka la pynbeit bad baroh ki jingpynkhreh ki la biang bad ka jingpyntrei kam ka la sdang ban ïaid shait shait ha baorh ki bynta.
Ha kajuh ka sngi la leit ban jurip ruh ïa ka jaka ban pynlong ïa ka jingïaseng paitbah ha pyrnon dikhar kaba don harud ka surok Nongstoiñ Umyiap. Ka jingpynbit pynbiang ïa katei ka jaka long jingïaseng paitbah ka balang ka la ïakut bas dang ha u bnai Nohprah mynta u snem.
Haba phai sha baroh ki jaka ba ka Jingïaseng Samla KJP Synod Sepngi ka la dep ban pynlong ka balang Presbyterian Umyiap, ka dei ka jaka kaba ki surok ki la don lypa na baroh ki phang, namar na Nongstoiñ ka lah don ka surok kaba ïaid lyngba ka Upper New Nongstoiñ, Mawkawah, Khliehmawlieh haduh pdeng shnong Nongrangoi (Umyiap), na Nongsohpian sha Domkohsam, Nongdiwah haduh Ïingmane Balang Presbyterian Umyiap, na mihngi na Ksehkohlong sha Mawïawet, Mawkynbat sha Nongrangoi bad na shaphang shathie pat na Jaidoh sha Nongklung, Lumpynngad sha Nongrangoi (Umyiap) bad ki jaka ba ki paitbah kiba wan jingïaseng kin pynïeng kali ruh ki la biang ha la ki jong ki jong ki lad ba ki wan.
Na ka bynta ban pynbiang ïa baroh ki jingdonkam na ka bynta katei ka jingïaseng, ka Balang ka kyrpad bad kyntu ïa ki tnad treikam jong ka sorkar ba kin shimkhia lem ban pynsted ïa baroh ki kam ha shuwa ba katei ka jingïaseng kan long, khnang ba kan ym don ka jingïaseng kan long kaba ïaid beit ïaid ryntih ha baroh ki liang.
