Nongpoh, Risaw 20: Ki samla pule Khasi na ka Regional Institute of Science and Technology (RIST) bad ka University of Science and Technology, Meghalaya (USTM) mynta ka sngi ki la pynlong ïa ka Fresher’s Meet ne jingïakynduh lang ïa ki samla Khasi ba dang wan pule thymmai kum ka jingithuh ithaw bad ban wanrah ka jinglong shipara. Ïa kane ka jingïalang la pynïaid da ka KSU RIST-USTM Unit.
Ha kane ka sngi, bun ngut ki samla Khasi kiba pule ha katei ka jaka pule ki la ïashim bynta bad la sakhi ruh ïa ka jingdon lang ki nongïalam na ka KSU Sengkmie, kiba kynthup ïa u Bah Donald V. Thabah, General Secretary, u Samla James Hitler Mawphñiang, Asst. Secretary ka Sengkmie uba long ruh u General Secretary ka KSU North Khasi Hills lem bad kiwei kiwei ki nongïalam ka seng.
Ha kane ka jingïalang, ka KSU sengkmie ka la ïoh ruh ban pynskhem ïa ki nongïalam ba thymmai jong ka KSU RIST-USTM Unit na ka bynta u snem treikam 2025-28 bad ka jingthmu jong kane ka unit ka long ban peit ïa ka bha ka miat jong ki samla Khasi ha katei ka skulbah, ban pynneh ïa ka jingsuk, jingkmen bad ban long ka jingkyrshan ïa kito ki samla ba mad jingeh.
Haba kren ha ka jingïalang, ki nongïalam ka KSU naduh u samla Donald V. Thabah bad u samla James Hitler Mawphñiang ki la pynpaw ka jingsngewkmen haba ïohi ba ki samla Khasi ki don ha ka jingïatylli bad ka jingïa ieid. Ki la ong ba tang da ka jingïatylli, ki samla Khasi kin nang khlaiñ bad lah ban pynshlur ïa kiwei pat ki samla ba kin don ka mynsiem kum shipara haba ki leit wad ïaka jingnang jingstad.
Ki la kyrpad ruh ïa ki samla ba kin minot thop ha ka jingpule, ba kin long ki nuksa ban ri kyndong ïaka akor ka burom bad khamtam ban wanrah burom bad ka nam sha ka jylla.
