Shillong, Naitung, 01: Ka Meghalalaya Pradesh Trinamool Congress ha ka sngi Thohdieng ka la mudui da ka ejahar sha ki Pulit jong ka Cyber Cell, Police Station halor ka jingpynsaphriang u kyrwoh khubor ba lamler ha ka kyrteng jong u National General Secretary ka All India Trinamool Congress u Abhishek Banerjee.
“Ka AITC ka pynrem jur ïa ka jingpynsaphriang ïa kum kine ki khubor lamler da ki riewshim kabu. Ki khubor lamler kiba long tang ki jingthmu ban pynjah burom ïa ka dur jong ka party yn map satia,”ong u kyrwoh na ka AITC.
Ha ka ejahar ba la soi da u Vice President ka MPTC u Bah James Lyngdoh u la ong ha ka 29 tarik, Jylliew ba ka party ka la pynlong ïa ka jingïalang jong ki nongïakitkam jong ka party bad ka jingplie ïa ka ophis treikam kaba thymmai ha kaba la sakhi lang da u National General Secretary u Abhishek Bannerjee ha ka por janmiet la lap ba la pynsaphriang ïa ka kyrwoh khubor lamler ba don ïa ka Letter Head jong ka Party kaba don ruh bad ka jingsoi jong u National General Secretary ha kaba pynjah burom ïa ka dur jong ka party da kaba ong ba ka Party ka la pynbna ïa ka thup kyrteng kaba ar jong ki arngut ki kyrtong u Vickey Dey bad ka Kong Patricia Mukhim kaba dei ka Editor jong ka Kotkhubor The Shillong Times ki ban ïakhun ha ka elekshon sha ka Ingdorbar Thawaiñ ka ban sa long ha u snem 2023.
Kane ka dei ka kyrwoh khubor kaba thok, kaba shukor bad kaba lamler ba la leh da ki briew bym ithuh da ka jingthmu ban pynjah burom ïa ka dur jong ka party bad ïa ka kyrteng jong ka Kong Patricia Mukhim kaba dei la ïoh pdiang ïa ka khusnam Padmashree kaba la tip lut da baroh ha ka imlang ka sahlang,” la ong ka ejahar na ka Party.
Ka MPTC ka la kyrpad ïa ki Pulit ba kin kem mardor ïa kiba donkti bad ban thwet janai ïa kiba la phah nyngkong eh ïa kane ka kyrwoh lamler ïa kaba la pynsaprhiang ha ka Social Media da kaba pyntreikam ïa ka kyndon hapoh ka aiñ The Information and Technology Act, 2000.
