Buh hakhmat eh ïa ka jingsumar ka bor pyrkhat bad wad ki lad na ki riewshemphang: Dr. P Sangma

Shillong, Risaw 16: Ka District Mental Health Program (NHM) ha ka jingiatreilang bad ka District Legal Services Authority (DLSA) Resubelpara ka la rakhe ïa ka World Mental Health Day hapoh ka phang, ‘Access to services – Mental Health in Catastrophes and Emergencies’, ba la pynlong ha Damas Higher Secondary School.
Ka DM & HO Dr. Priya Sengse R. Sangma ha ka jingkren ka la banjur halor ka jinglong kongsan bad buh hakhmat eh ïa ka jingsumar ïa ka bor pyrkhat bad ban wad ki lad ki lynti na ki riewshemphang lada donkam. Ka la pynpaw ruh ïa ka jingdonkam ban pynduna ïa ki kam kiba ïadei bad ki bor pyrkhat bad ban kyntiew pat ïa ka koit ka khiah ka bor pyrkhat da ka jingkyrshan ki lad ai jingsumar.
Ha kane ka jingrakhe, ka Dr. Sangma ka la plie ruh ïa ka National Deworming Day ha ka district, ha kaba ka la pynshlur ruh ïa ki nongïashim bynta ban dih ïa ki dawai wieh (deworming tablets).
Katba ka Dr. Rezia K. Sangma, DIO Incharge, North Garo Hills, ka la banjur halor ka jingdonkam ban pynbun ki lad jingpynsngewthuh shaphang ka koit ka khiah ka bor pyrkhat, kyrpang ha ki por ba long kyrkieh. Ka la kyrshan ruh ïa ka jingdonkam ban pynduhnoh ïa ka jingshah pynlehraiñ tang na ka daw ba don ki jingduna ha ki bor pyrkhat, hynrei ban thaw ki lad kiba ai ki jingkyrshan bad ïarap ïa kane ka bynta jong ka koit ka khiah.
Na ka liang u Deputy Superintendent of Police u John C.A. Sangma u la ïathuh ïa ki kam ba la leh da ka tnat pulit ban jubab ïa ki jingjia kiba ktah ïa ki briew kiba duna ha ki bor pyrkhat bad ka ai ruh ki jingkyrshan kiba pura ïa ki. U la kren ruh halor ki jingma kiba ktah ïa ka koit ka khiah na ka jingdih ïa ki drok bad kiwei pat ki jingdih pynbuaid.