Plie paidbah ka MLA Sutnga-Saipung ïa ka skim um bam WSS-JJM ha shnong Pyrtakuna EJHD

Khliehriat Risaw 14 : Ka MLA jong ka Sutnga-Saipung, ka kong Santa Mary Shylla mynta ka sngi ka la pyllait paidbah ïa ka um bam um dih ha shnong Pyrtakuna, East Jaiñtia Hills District, ka Pyrtakuna Water Supply Scheme (WSS) kaba hapoh ka skim Jal Jeevan Mission (JJM), ki nongshong shong jong ka Pyrtakuna ruh ki la pynpaw ïa ka dur khmat kaba kmen namar ki la ioh pahuh ïa ka um ha man la ki thliew ïing jong ki, ha ki skul bad ha ki Aganwadi Centre.
Ka tnat PHE ka la pyntrei ïa katei ka project sam um ha shnong Pyrtakuna ha ka jinglut kaba kynjoh sha ka T 1.83 klur tyngka bad ki la don 107 tylli ki longïing kiba la ioh ïa kane ka um ha ki iing ki sem jong ki.
Haba kren kum ka kongsan ka MLA ka la kyntu ïa ki paidbah ba ki dei ban ri ban sumar bha ïa ki tyllong um ym ban pynjot pynjulor ïa ki tyllong um bad ka la ai ruh ka jingkitbok kitrwiang ïa bad ai khublei ïa ki heh sorkar jong ka tnat PHE na ka bynta ka jinglah ban pynurlong ïa kane ka project sam um jong ka Jal Jeevan Mission (JJM) ha shnong Pyrtakuna kaba dei ka mission halor ka jingiohi jngai u myntri rangbah duh ka ri u Narendra Modi kaba u la buh thong ruh ba baroh ki longiing ha ka ri ki dei ban ioh ïa ki kor um ha ki ïing jong ki.
U Deputy Commissioner, East Jaiñtia Hills District, u Shivansh Awasthi, IAS u la ong ba ka long kaba donkam ban ioh ïa ka um kaba bha ha ki ïing ki sem namar ka um ba bha ka ïada na ki khñiang jingpang, u kyrmen ruh ba kane ka project sam um kan nang ïai bteng ha ki por ki ban wan ruh da kaba yn pyrshang ban pynneh pynsah ïa ki tyllong um bad halor kane ka jingthmu ban pynneh ïa ki tyllong um u Deputy Commissioner u la ong ba un sa shim ïa ka jingiatreilang sa bad kiwei kiwei ki tnat kum ka tnat Soil and Water Conversation bad ka tnat Water Resources departments.
U Waheh Shnong Pyrtakuna, u bah Loveyou Bareh uba pyniaid ïa ka prokram, u la ai ka jingkhublei sngewnguh ïa ka MLA, ka kong Santa Mary Shylla, ïa u Deputy Commissioner, u Shivansh Awasthi, ïa ka tnat PHE kiba la lah ban wanrah bad pynurlong ïa kane ka project sam um hapoh shnong bad kum ka dak ka jingsakhi ïa ka jingioh um ha shnong, u bah Loveyou Bareh u la phah rah kti ïa baroh ki nongshong shnong ha kaba da ka jingkmen ki nongshong shnong ki la rah la ki kti kaba long ruh kum ka dak ka jingai khublei ïa ki heh kiba pynioh ïa ka um ha man la ki thliew ïing.
Ha katei ka prokram ha Pyrtakuna la ïa don ryngkat lang ruh ka Executive Engineer, PHE Division, Jowai, ka kong R. Kynjin, u BDO Lumshnong Block, u bah M.Kyndait,u SDO, PHE Khliehriat, u bah M. Passah, u JE, PHE Khliehriat, u bah D.Dkhar, u Secretary shnong u bah Pillarson Shylla lem bad ki paidbah nongshong shnong jong ka shnong Pyrtakuna.