Shillong, Risaw, 10: U Symbud Myntri Rangbah ka Jylla Bah Sniawbhalang Dhar uba long ruh u Chairman jong ka Regional Committee na ka bynta ka West Jaiñtia Hills ha ka sngi Thohdieng u la pynthikna ba ka jinglong jingman ha Lapangap ka la jaijai bad la khmihlynti ba ka shongsuk shongsaiñ kan sa wan phai biang ha ki sngi ki ban sa wan.
Kane ka jingkular u Symbud Myntri Rangbah ka long hadien shisngi ba ka la mih ka jingïapynibor hapdeng ki jaidbynriew Karbi bad ki Khasi Pnar ha khappud ka Jylla Assam bad Meghalaya kaba la lam shaduh u pud ba uwei u Karbi un duh ei ïa la ka jong ka jingim.
Katkum ka jingong jong u Bah Dhar, ka jingïakynad ka la jia ha ka por ba ki Khasi Pnar ki dang ot ïa u kba, ka jingjia ka bym pat ju jia mynno mynno ruh, bad ka bym don jingïadei eiei ruh em bad ka jingïajia pud hapdeng ki ar tylli ki jylla.
U la ïathuh, ha ka jingïakren bad ki lad pathai khubor, ba ki Myntri Rangbah jong ki ar tylli ki jylla ki la ïakren halor kane ka jingjia, bad ki Regional Committee kin sa shim ïa ka rai ban pynkut noh ïa kine ki jingïakynad.
U Bah Dhar u la ong ruh ba la bthah ïa ki bor synshar district ba kin ïatreilang bad ki bor synshar district na ka jylla Assam khnang ban khanglad ïa kino kino ki jingïakynad.
“Kumba ka long mynta, ka jinglong jingman ka la jaijia, bad ngi kyrmen ba kan nang kham bha shuh shuh ha ki khyndiat sngi ki ban sa wan,” u la ong bad pyntip ruh ba ki Regional Committee kin ym pat lah ban ïakynduh ïa mynta.
Haba kylli, u Bah Dhar u la pynshai ba katto katne ki jaka, (naduh Khanduli bad Psiar) ha shilyntei ka khappud ki dei kiba don ha ka jingïakajia, hynrei ka jingïakynad ka jia wat ha ki jaka bym don ka jingïakajia. Ki Regional Committee jong ki ar tylli ki jylla kin sa shim rai halor ka jinglong jingman jong ka jaka.
U Bah Dhar u ong ruh ba ïa ka jingot kba la hap ban pynsangeh shwa ïa mynta hynrei ki bor synshar district ki la pyrshang ban pyntikna ba ka jingot kba kan sa bteng biang tang shu wan phai ka shongsuk shongsaiñ hadien ka jingïakren pynbeit.
“Ngi kwah ban pynthikna ba ha ki khyndiat sngi ynda la shong ïakren, ka jingot kba kan bteng biang kumba ju long,” ula ong.
U ong ruh ba ka Sorkar ka dang peitngor bha ïa ka jinglong jingman khnang ba kan ym jia shuh nangne shakhmat.
