Donkam ka sienjam kaba shai halor ka jingpynbeit pud ka Meghalaya-Assam, ong u Mukul Sangma

Shillong, Risaw 10: U Nongïalam ka Liang Pyrshah u Mukul Sangma u la khot ïa ka jingdonkam ka sienjam kaba shai haba ïadei bad ka jingpynbeit ïa u pud u sam hapdeng ka Meghalaya bad Assam.
Ka jingkren jong u ka la wan hadien shisngi ba la mih ka jinghuri hura hapdeng ki nongshong shnong Karbi bad Pnar ha shilynter u pud u sam ka Assam bad Meghalaya kaba la wanrah ka jingkhlad noh uwei u briew.
Haba kren sha ki lad pathai khubor ha ka sngi Thohdieng, u Sangma u la pynpaw ïa ka jingsngewkhia kaba jur halor ka jingduh ka jingim briew bad kaba la wanrah ka jingmynsaw ïa kiba bun kynthup ïa u pulit.
U Nongïalam ka Liang Pyrshah u la banjur halor ka jingdonkam ban don ka jingïakren bad ki paidbah na baroh arliang khnang ban ïoh ka jingshaniah bad jingsngewthuh. U la ong ruh ba ka long kaba donkam mardor ïa baroh ar tylli ki bor pynïaid sorkar ba kin ïakren ha kiba bun ki kyrdan ym tang ha kawei ka kyrdan.
U Sangma u la pynpaw ki jingsngewlem sha ki longïing jong kiba la khlad noh bad pynpaw ka jingkyrmen ba kito kiba mynsaw kin ïoh noh ka jingkoit jingkhiah.
U la kyrpad ïa ka jingdonkam ban wanrah biang ïa ka shongsuk shongshngaiñ bad ka sawdong sawkun kaba suk ba saiñ khamtam ïa ki nongshong shnong ha baroh ar liang jong u pud u sam.