7 sngi ai por ka EC ka KHADC ban pynshai ka Superintendent halor ka Professional Tax sha ki dukan shnong

Shillong, Risaw 7 : Ka Executive Committee ba la ïalam da ka VPP ha Khasi Hills Autonomous District Council (KHADC) ka la ai por hynniew sngi ïa ka Superintendent of Professional Tax ka kong Sosti P Mylliem Ngap ban ai ïa ka jingpynshai halor ka jingkynnoh ba phah shithi ban siew ïa ka Professional sha ki dukan kiba don ha ki shnong ki thaw khlem da ïoh bor na ka EC.
ïa kane ka jingpynshai ba la pan da u Secretary ka EC ha KHADC ha ka Sngi Thohdieng la pynpaw ba ïa kine ki shithi la phah sha ki dukan shnong haka 29 bad 30 tarik ha ka por ba wat tang ïa ka EC kaba thymmai ruh ym pat thaw satia hadien ka jinghiar shuki jong u CEM ba rim.
“ Katba ïa ka shithi pat la dep ai khlem da ïoh jingbit ne khlem da ïoh jingmynjur na ka EC….” Kumta la bthah ïa phi ba phin ai ka jingpynshai hapoh hynniew sngi naduh ka sngi ba ïoh pdiang ïa ka shithi ban pynshai balei ban ym pynshitom ïa phi kat kum ki kyndon aiñ ba la pyntreikam.