Ka projek shna surok ba 4 klur tam ka long kum ka surok khlaw, lap ka HYC ha ka jingjurip

Mawkyrwat, Risaw, 09: Ki nongialam ka Hynñiewtrep Youths Council (HYC) Mawthawpdah Unit hadien ba la ïoh ka jingujor na ki paidbah nongshong shnong jong ka thaiñ halor ka jingsniew palat ka surok na Nongdiat- Nongsynrieh bad na Nongdiat- Mawramhah ha ka sngi Balang ki la leit jurip ïa ka surok bad lap ïa ka jingjot rathai jong surok kaba la long thik kum ka surok khlaw.
U General Secretary ka HYC Mawthawpdah Unit Welman Kharlyngiong u la ong katkum ka jubab RTI ba la ïoh na ophis u Executive Engineer PWD (Roads) Mawkyrwat Division, la kdew shai ha ka Detailed Project Report (DPR) ba ka jingthmu jong ka surok ka long, ban pynsuk ha ka kit ka bah ïa ki mar rep namarba ka surok ka ïaid lyngba ki jaka rep baroh shi lynter, kawei pat ka long ban pynsuk ïa ka leit ka wan ïa ki khynnah skul namar ka Nongsynrieh ka dei ka pdeng ha ka jingleit pule jong ki khynnah, ban ïarap ïa ki nongrep ba kin bteng ïa ka kam rep jong ki da kaba pynïasoh ïa kane ka surok bad ban pynjan ïa ka leit ka wan sha Eastern West Khasi Hills District bad kiwei kiwei.
“La mang pisa T. 4,15,75,000 klur ban shna ïa kane ka surok,” la ong u General Secretary.
U la ong ba katkum ka mang pisa la khmih lynti ban ïoh ïa ka surok kaba bha, kaba bit ba biang bad ban ai jingmyntoi shisha ïa ki nongrep bad ïa ki paitbah kiba pyndonkam ïa ka surok hynrei kumba ka long mynta ka surok ka dang long kum ka surok khlaw kaba khohruh khohram.
Lah ban kdew ruh ba ka HYC ha u snem ba la dep ka la pynsngew ha u SDO PWD Road Mawsaw Division ban pynbha ïa ka surok ha kaba u ladep kular ban shimkhia hynrei haduh mynta ym pat shem la ïohi dak ei ei bad ka surok ka la nangjot nangjot.