Jowai, Risaw 06: Ka jingkhladnoh u Rev. Phadar Hilarius Lamare na kane ka sla pyrthei ka la long ka jingduh kaba khraw ïa u ‘riew aiti lut uba la aiti met bad mynsiem ban shakri ïa u Blei, ïa ka Balang bad ïala ki parabriew.
Tang shu tip ba la wan poi ka met ïap jong u Phadar Hilarius Lamare hynnin ka sngi 05/10/25 ha Jowai nalor ki khynnah skul jong ka Marianhill Higher Secondary School, St. Mary Mazzarello Higher Secondary School bad ka Tome Memorial Secondary School, ki Lyngdohsohblei (Phadar), ki riewniam, ki Sister kiba trei hapoh ka Diocese Jowai bad na ka Archdiocese Shillong, da ki hajar ngut ki paidbah na kylleng ka Rilum Jaiñtia bad na Khasi Hills ki la ïatuid sha Jowai, ha Marianhill ban wan ai khublei khatduh ia ka Met jong u Phadar Hilarius Lamare, u Parish Priest ka shnat niam Jowai uba la khladnoh na kane ka pyrthei.
Related Posts
Napdeng ki hajar ngut ki riewpaidbah la wan sngewlem ki nongmihkhmat paidbah kum u ma Sniawbhalang Dhar, Deputy Chief Minister ka Jylla, ma Coming One Ymbon MLA, Dr. Mazzel Ampareen Lyngdoh MLA, kong Santa Mary Shylla MLA, ma Hambertus Nongtdu MDC, ma Awhai Andrew Shullai MDC, bah J.A. Lyngdoh Ex-MLA, ma Workman Shadap MDC, ma Grecentus Susngi MDC bad kum juh na ka liang ki Nongsharai Balang bapher bapher kum u Revd. Lumlang Khongthohrem Presbyter Church India Jowai, Revd. Dr. N. W. Lyngdoh Church of North India Jowai bad kiwei de ki riewkhmat na ki kynhun niam bapher bapher.
Ïa ka met ba dangsah jong u Phadar Hilarius Lamare yn leh burom khatduh ha ka 07/10/2025 naduh ka por 10:00 AM mynstep ha Mynshem Parish Jowai ha kaba ïa ka jinglehniam yn pyndep da u Most. Rev. Ferdinand Dkhar DD, Bishop ka Jowai Diocese.