Jowai, Risaw 05 : Ka E Iadaw Masi kaba shisien shisnem ka dei ka Culture jong ka shnong kaba la saiñdur da ki longshwa manshwa hadien ka bet ka thung ïa u Kba ha ki Hali ki Pynthor jong ki bad ha shwa ban lum ban lang ha ki Thiar ki Tyllu jong ki. Ia kane ka E Iadaw Masi rong la ong ba la dei ban pynlong naduh kine ki bnai kiba la dep bad ban pyndep ïa kane ka E Iadaw Masi kaba long kawei na ki Culture jong ka shnong wat lada khamdier ka por, hynrei pat ban pyndep ïa kane ka Culture ka E Iadaw rong kaba shisien shisnem ka Dorbar shnong Nangbah ka la pynlong ïa kane mynta ka sngi (04/10/2025) ha Madan Pyngkai Nangbah ha kaba u ma Coming One Ymbon, u Local MLA u long u kongsan.
Ha kane ka sngi ha shwa ban E Iadaw la pynlong ïa ka jingïalang kaba lyngkot bad wat lada ka dei ka por ot Kba pynban ka E Iadaw Rong jong ka shnong Nangbah ka long kaba phuh baphieng bad kaba shongshit naba ki nongshong shnong jong ka Nangbah ki ieh na ka kam ot Kba bad ïabeh sha kane ka Iadaw rong kaba dei ka Culture jong ki nongshong shnong.
U ma Coming One Ymbon haba kren ha kane ka sngi u ong ka E Iadaw Masi rong kaba shisien shisnem ka dei ka Culture jong ka shnong ka thaw ym tang ha Nangbah, hynrei ha kiba bun ki shnong hapoh ka Constituency jong u ki pynlong ïa kane ka E Iadaw Masi kaba shisien shisnem bad u pynpaw ïa ka jingkmen ka bakhraw haba u la ïoh ïa kane ka lad ban ïa don bad ïa kmen lang ha kaba kum kane ka sngi bad ki Nongshong shnong jong ka Nangbah.
Haba kren kum u MLA ka thaiñ u ong ba na ka liang jong u kum u Nongmihkhmat jong ki um shym la ieh khunswet ïa ka shnong Nangbah, ka shnong kaba hapoh ka Constituency jong u, hynrei u la kyntu u la kynrong lyngba ki jingïarap ïa ka shnong ka thaw kat kaba u lah ei. Nangta u la pynthikna shuh shuh da kaba ong ba un nangthaw ki lad ki lynti jingïarap ha kiba bun ki liang na ka bynta ka shnong Nangbah. Ha kane ka sngi u ma Coming One Ymbon u la noh synniang khatsan hajar (Rs.15,000) sha ka Dorbar shnong kaba pynlong ia kane ka E Iadaw Masi rong jong ka shnong.
Kham hashwa la ïoh ïa ka jingkren pdiang sngewbha ïa baroh da u ma Tonroy Iongwai uba long ruh u Waheh shnong jong ka shnong Nangbah. Ha ka juh ka por u la pynsngew ha u ma Coming One Ymbon MLA ïa ki jingdonkam jong ka shnong bad ki Nongshong shnong jong ka. Ha kane ka sngi la ïoh ruh ïa ka jingkren na u ma Raplang Lamare, ma Meiowan Pasi bad na u Dr. Dapmi Higne, incharge PHC Nangbah.
Ha kane ka sngi la mih madan kumba 25 jur (50 Tylli) ki Masi Kyrtong kiba la jied kynsai, 15 jur napoh ka shnong Nangbah bad 10 jur na ki shnong ba marjan bad ka jingïadaw jong ki, kaba la pynsngewbha bad pynkmen ïa ki Nongpeitkai. Ha kane ka sngi ïa ka jingïalang la pynïaid da u ma Erwin Susngi uba long ruh u Chairman Shnong jong ka shnong Nangbah bad kyntang ïawai ïa ka jingkren ai khublei (vote of thanks) da u ma Heibormi Lyngdoh.
