Ai khublei ki MDC ïa u CEM thymmai, kitbok ïa u CEM barim

Shillong, Risaw 01 : U CEM ba thymmai ka KHADC u Bah Winston Tony Lyngdoh u la pynpaw ïa ka jingduh nong kaba khraw ba iehnoh kam kyndit u CEM barim Bah Shemborlang Rynjah bad u pynpaw ka jingsngewkhia namar um ïoh shuh ban pan jingmut ban ïasyllok namarba u la dei ban phah sumar shwa watla ba la hap ban ïatynrong lang ïa ki kam.
U la pynpaw ka jingai khublei ïa u LO ne nongïalam ka Liang Ïatei u Bah TW Chyne bad baroh ki paralok MDC bad u kyntu ruh ïa ki paidbah ban long ki nongshong shnong kiba adkar ban kren pyrshah namar ka pang ka shitom.
“Nga ai khublei ïa baroh kiba la mynjur ban jied ïa nga bad kumjuh ruh ïa ka party ha kaba kane ka pyni ïa ka jingïatylli bad long katba long jia katba jia ngin trei beit khlem kwah burom, khlem kwah spah hynrei ka burom u paidbah bad ngin trei da kaba jar jar bad ba ka kam kan kren khamjam,” u la ong.
U la pynthikna ruh ba lada ki MDC ki sngew ba ka don ka jingthylli kane ka EC kan pdiang bad plie ka jingkhang na ka bynta baroh namar nangne shakhmat hap kit bad tynrong ïa ka kam kaba khia.
“Tang marwei kan long kaba eh ban trei hynrei donkam ka jingïatreilang, wan ban ai jingmut ban ïateilang namar ïa ngi la jied da ki paidbah ngin ïaid shakhmat khlem tieng khlem kynran dien ban leh ïa kaei kaei kaba dei ban leh bad ngin kynmaw lem ruh ïa u CEM barim bad ïa ka ïing ka sem da ki jingduwai ba un Koit un Khiah noh ban wanphai biang sha ka council bad nga ngeit ba ki MDC kim dei ban ai daw ba dang thymmai ne bym pat tbit hynrei ban pynthikna ban kyntiew biang ïa ka nam ka burom ka Council,” ula ong.
Ha kane ka sngi baroh ki MDC ka KHADC ki la pynpaw ïa ka jingkhublei kitbok ïa u CEM ba thymmai ka KHADC uba dang shimti nyngkong eh ïa ka shuki CEM hadien ka jinghiar shuki kaba kynsan jong u CEM barim ka KHADC u Bah Shemborlang Rynjah na ka daw jong ka jingban khia jong ka jingpang jingshitom ha ka met jong u kaba lah neh slem haba kaba u la lah pat ban shakri ïa ka kam CEM la 6 bnai eiei.
Ki MDC kiba la kitbok kitrwiang ïa u CEM ba thymmai ka KHADC u Bah Winston Tony Lyngdoh bad kumjuh ban pynpaw ka jingkyrmen ba u CEM barim ba un shait un khlaiñ noh, ki long u Nongïalam ka Liang Ïatei u Bah TW Chyne uba la pynpaw ban ai ka jingkyrshan, ban ai jingmut ïa ka EC ba thymmai hapoh ka jingïalam u CEM ba thymmai.
Nangta u MDC ka Mawthadraishan constituency u Bah Powell Sohkhlet uba la pynpaw ba u Bah Tony uba la bat kum u EM 6 bnai ula ïohi ba u la don ka jingtbit bad kyrmen ba un lah pynïaid shakhmat ïa ki kam, watla sngewsih ba hap iehnoh kam kyndit u CEM barim na ka daw ba um don ha ka met bad Koit ba Khiah.
U la ïathuh ba haba ki MDC kiba la don marjan bad u Bah Shemborlang Rynjah la ïohi shisha ba u la shitom bha hynrei namarba u dei uba satar u la trei shitom beit ïa ka kam. “Nga ka kyrpad ïa ki paidbah ba kim dei ban don ka jingsngew lyngngoh ïa ka jinghiar shuki jong u CEM barim hynrei ban duwai ban un ïoh noh ka met bad Koit ba Khiah bad nga pynpaw ruh ba ka jingkhang jong ki EM ka long barabor na ka bynta baroh ki MDC,” u la ong.
Katba u MDC ka 15 Laban Mawprem constituency u Bah Ricky Shullai u la kitbok kitrwiang ïa u Bah Shemborlang Rynjah namar u la dei u nongïalam ba don jingkitkhlieh bad u la kitbok kitrwiang ruh ïa u Bah Winston bad kyrmen ba un shimkhia ïa ki kam khamtam ba mynta ka Sorkar ka la sdang knieh noh ïa ki constitutional rights ka council.
Katba u MDC ka Mawthengkut u Bah Srally Rashir u la ai khublei ïa u CEM ba thymmai bad kyrpad ba un peitbniah ïa ki jaka puta ba la shah knieh ha kiwei ha ki thaiñ khappud.
Kiwei kiwei ki MDC ba la kren ki long u MDC na 7 Mawkynrew, u MDC ba shu shah thung na Mawhati, u MDC Mawphlang Bah L Marbaniang, ka Kong Badaplin Lyngdoh Nonglait, u MDC ka Mawkyrwat, ka MDC na Laitumkhrah Malki ka Kong Deiti Majaw, nangta u MDC ka 20 Mawlai constituency bad khatduh eh u MDC ka 18 Mawkhar Pynthorumkhrah constituency uba dei ruh u Shongknor (Chairman) ka KHADC u Bah Strong Piller Jana uba la ong ba ki paidbah ka Nongthymmai Constituency ki long kiba phylla bha naba mynshwa ki la jied ïa uwei u Bah Tony Lyngdoh uba la long u Myntri ka Sorkar jylla bad mynta ruh ki la jied sa uwei pat u Bah Tony Lyngdoh kum u CEM KHADC.