Khliehriat, Nailur, 30: Uwei u rangbah uba la tip kyrteng kum u Bah Justine Pakem na ka shnong Lumthari, East Jaiñtia Hills District u la jah rngai khlem wan phai shuh sha la iing naduh ka 24 tarik, Nailur 2025. Ki bahaïing hasem u la pyntip ruh sha ki Pulit ka Mooriap Border Outpost.
Ki bahaïing ki ong ba ki la ïoh jingtip shaphang ka jingjah u Bah Justin Pakem ha ka 25 tarik mynta u bnai ha ka por kumba 9:00 baje mynstep ha kaba ki ïoh jingtip na ki briew kiba phah pyntip lyngba u Syot Lamurong na ka shnong Mynthning uba ïa shong ïa sah lang bad u Bah Justin Pakem ha Bri Wareh ha jaka ba ki ju set ïa ki masi namarba ki dei ki nongsharai masi.
Ki bahaïing ki la ïoh jingtip ba ha ka janmiet 24 tarik mynta u bnai ynda u Bah Justin Pakem bad u Bah Syot Lamurong ki la dep set ïa ki masi hapoh sem ma ki ar ngut lem bad uwei pat u paralok uba kyrteng u Spik Shylla na ka shnong Larket ki la ïa leit donkam sha shnong Shyrwang bad ki la ïa shong dih kyiad lang ruh bad dei haduh ka por 9:00 baje mynmiet ki la ïamih na shnong Shyrwang ban leit phai noh sha Bri Wareh sha ka jaka ba ki ju set ïa ki masi bad jaka ba ju sah miet bad u Syot u la ong ba ha ka step jong ka 25 tarik mynta u bnai u la phah ïa ka jingpyntip sha ki bahaïing ba u Bah Justin Pakem u la jah bad khlem wanphai shuh sha Bri Wareh.
Ki bahaïing ki la kyrpad ba lada don mano mano ba ïohi ne tip shaphang u Bah Justin Pakem kin sngewbha ban pyntip da kaba phone ha u mobile number: 8132906185 bad 9612080908.
