Khliehriat, Nailur 24 : Kawei ka longkmie kaba tip kyrteng kum ka kong Prety Shylla, kaba na shnong Byndihati, East Jaiñtia Hills District ka la pynpaw ka jingsngew khia kaba khraw halor ka jingbym lah pyniang tiar kali ka company Mahindra ha East Jaiñtia Hills District bad ka la kyntu jur ïa kino kino ki company kynthup ka Mahindra, ka Tata bad kiwei kiwei ba kin pynbiang ïa ki tiar kali hapoh ka district khnang ba kan nym buh jingeh than ïa ki trai kali lada sniew ka kali bad lada donkam thied tiar kali “Lada kino kino ki company kim lah pynbiang tiar sngewbha khang dam noh ïa ka company ban nym buh jingeh ïa ki trai kali” ong ka kong Prety Shylla
Ka kong Prety Shylla ka la pynpaw ka jingsngew bitar ruh halor ka jingbym ioh ïa ki tiar kali napoh ki dukan kiba don ha East Jaiñtia Hills District bad na kiwei kiwei ki jaka ba mar jan namar ka kali trok dumper jong ka la sniew bad don jingthut khyndiat bad mynta la don shi taiew ka kali ka la shu ieng ha surok national highaway ha Deinshynrum lem bad u mawshun ba mut ban pynpoi sha kawei pat ka jaka ka daw baroh ka dei namar ba ym lah ban ioh ïa ki tiar kali napoh ka district bad watla ka la pyrshang ban leit thied sha Ka lain bad sha Silchar Assam ruh ym ioh satia bad la sngewthuh ba ïa ki tiar kali lah ban ioh tang na Guahati, ha kaba ïadei bad ka jingsniew ka trok ha surok, katei ka longkmie ka la pyrshang ban wad jingiarap na ki nongtrei jong ka company Mahindra kiba ba don ha Khliehriat bad na ka bank ba ka shim ram hynrei kim lah satia ban iarap ïa ka kumta kane ka la pynsah umdum ïa ka kum ka trai kali bad ka la ong ruh ba lada long ha kane ka rukom ka ktah wat ïa ka kam khaïi pateng jong ka ruh.
Ka la ong ruh ba lada ka kali ka shu sahkut sah kumne bun bun sngi kan ktah ïa ka ioh ka kot ruh bad kan buh jingeh ïa ka ban siew ïa ka ram kali ha bank namar lada ym trei na ei yn ioh ban pynlang pisa ban siew ram ha bank.
Ka la kyntu jur ruh ïa ka company Mahindra ba lada long kaba lah ka dei ban wanrah da ka show room kaba biang bad kaba lah ban pynbiang lut ïa ki tiar kali lada donkam namar ïa ki nongshna kali ne ki mechanic lah beit ban ioh hynrei kaba eh pat lada ym ioh ïa ki tiar ka la kyntu ïa ka company Mahindra ba kan shim khia ïa kane khnang ba kan nym buh jingeh ïa ki trai kali bad ba kan nym ktah ïa ka trei ka ktah bad ka khaïi ka pateng.
Kum ban shu bynrap, ka kong Prety Shylla kaba na shnong Byndihati ka dei ka longkmie kaba treishitom bha bad kadei kaba im ja da kaba khaïi mawshun bad dang ha kine ki khyndiat bnai ka la sei sa kawei ka kali trok dumper bad kane ka kali ka la don jingthut khyndiat bad na ka daw ka jingbym ioh ban thied ïa ki tiar kali napoh district bad na ki shnong ban mar jan na Assam kum na Ka lain na Silchar katei ka kali haduh mynta ka dang sahkut sah ha surok lem bad u mawshun ba la thep ba thmu ban pynpoi sha Byrnihat.
