Ha u 2016 ka Mawkhar dei kaba nyngkongeh ban shah lynshop ha u drok, ïathuh u Bah Ransom Sutnga

Shillong, Nailur 23: Ka Mawkhar Dorbar Shnong da ka jingïatreilang bad ka Seng Kynthei Mawkhar Welfare Organisation, ka Seng Samla Mawkhar bad ka Mawkhar Sports Club ki la pynlong ïa ka March Against Drugs ne ka jingïaid rally ban pyrshah ïa u Drok.
Ha shwa ban sdang kane ka jingïaid rally ka la don ka jingïalang kaba lyngkot ha Mawkhar Community Hall ha kaba ïa ka prokram la pynïaid da ka seng kynthei bad la ïoh ka jingduwai da u Dr Toi bad ka jingpynlong ïa kane ka rally ka long, kumba la ïathuh da u Rangbah Shnong u Bah Ransom Sutnga, ba ka shnong Mawkhar ha u snem 2016 kadei kaba nyngkong eh ban mad ïa ka jingshah lynshop ha u drok bad bun bha ki kam khaïi bad kam dih drok ki jia naduh utei u snem.
Ki nongbatai shaphang ka jingma naba dih ïa u drok ki long ka Kong Eudora Warjri Adviser VHAM bad u Bah Barry L Kharmalki General Secretary ka Meghalaya Users Forum (MUF).
Ka Kong Warjri haba kren ka la ong ba ka jingïaleh ban dih ha ka por ba sdang ïa u drok kan lam beit sha ka jingkyrni bad ha kane ka juk mynta baroh la ïatip bha shaphang u drok. Ka la ong ba ki samla ha ka rta kaba 14, 15 snem shaneng ki ngop bha ha une u jingdih pynbuiad naba ha kaba sdang ki kwah tang ban mad ym ba ki kwah ban kyrni hynrei da la pyrshang katto katne sien ka pynkylla kyrni syndon.
“Kumta ym lah satia ban kheiñ sting ïa kane ka jingkwah ban mad bad kane ka prokram ba la leh da ka shnong ka dei namarba ki la ïohi ba la jur palat ka jingkyrni. Shisien ba la sdang ban dih la sngew ba ka pynshlur ban leh ïa kaei kaei ka kam bad ka long ruh kaba eh bha ban sangeh bad khamtam haba la long kyrni bad donkam bun kiei kiei kiba dei ban leh bad ka donkam ruh ka jingsumar kaba jrong bha bad kaba shyrta. Ka jingkyrni kam dei ka kam kai ban rkhe bad ka jingkyrni ka don ka jingïadei bha bad ka jingbun ki jingmut jingpyrkhat,” pynkut ka Kong Warjri.
Katba u Bah Bary L Kharmalki u la ong ba 65 haduh 75% na ki samla kim kwah shuh ban im naba bun ki mad ïa kine ki jingmlien kumta dei ban ong ‘Smart don’t Start’. “Haba don kano kano ka jingeh ka mut ba baroh ki don ki jingduna bad ym lah ban kynnoh ïano ïano ruh hynrei ban ïatreilang. Ngi hap ban buh ïa ka mynsiem ba kwah wanphai. U briew uba la sngewpoh ïalade u bun bha ki jingmut jingpyrkhat bad ngat ruh ha ki jingshah pynshoi. Ka kiad kadei ka kmie Ieit jong u drok bad ka ktah ïa ka met, ïa ka bor pyrkhat bad ïa ka kam mynsiem. Ka rai ka shong ha ki kti jong ngi kumno ban leh,” ong u Bah Kharmalki.
Na ka liang u Rangbah Shnong u Bah Ransom Sutnga u la ong ba ka jingpynlong ïa kane ka prokram ka long hadien ba ka la don ka jingïakynduhlang bad la rai ban pynlong ïa kane ka rally ban pynpaw paidbah ba ka Dorbar Shnong ka pyrshah ïa u drok.
“Ki don 250 ngut ki khynnah skul kiba kynthup na ka skul St. Dominic Savio’s Higher Secondary School bad ka Mawkhar Christian Higher Secondary School ha ka jingïasnohktilang bad kiwei kiwei bad kine kin long ki tnat kiba pynphriang ïa ka khubor. Ha u snem 2016 ka Mawkhar kadei ka shnong kaba nyngkongeh ba shah lynshop ha u drok ha kaba uwei u samla u la shim noh ïa la ka jingim da kaba sdien phasi. Nga kynmaw ba ha kine ki snem ter ter ki la don bun ki briew kiba wan ïaid sha ki lynti shnong ban die bad dih ïa u drok bad halor kane ba ka shnong ka la pynthymmai ïa ka jingtreikam da kaba buh bun ki CCTV,” ïathuh u Bah Sutnga.
U la pynpaw ruh ba na ka liang ka shnong ka kloi ban ïarap phah sumar bad bah khlieh ïa kino kino ki briew kiba la kyrni ha ka kam dih drok lada ki kmie ki kpa ne ki bahaïing ha sem ki kloi ban wan pyntip sha ki nongpynïaid shnong.
Hadien kane ka la don ka jingïaid rally ba la plied a u Rangbah Shnong kaba la sdang na Community Hall sha Motphran, nangta sha Umsonsun, mih biang sha Mawkhar bad pynkut biang ha Community Hall. Ki khynnah skul bad kiba la shim bynta ki la rah ïa ki placard kiba don ki jingthoh bapher bapher da kaba pyrta ruh ha lynti ban ong em ïa u drok bad ‘Smart Don’t Start’.