Da ki Chairman ba thymmai yn thung ka sorkar ban bteng ka jingpynbeit pud ka Meghalaya – Assam

Shillong, Nailur 21 : Khnang ba ka jingpynbeit pud hapdeng ka Jylla Meghalaya bad ka Jylla Assam kan ïaid beit, na ka liang ka sorkar Jylla ka la pynbeit ba kan shong noh shen ban jied ïa ki Chairman ba thymmai jong ki Regional Committee hadien ba uwei na ki Chairman jong ka Committee Bah Paul Lyngdoh um shym la don shuh ha ka Kynhun Myntri.
Lah ban kdew hangne, u Bah Paul u bat kum u Chairman jong ka West Khasi Hills Regional Committee kaba dei kawei na ki thain baka jingïakren pynbeit pud ha ka kylla kaba ar ka dang sahteng mynta.
Na ka liang u Symbud Myntri Rangbah ka Jylla u Bah Sniawbhalang Dhar uba bat ruh kum u Chairman jong ka Regional Committee Jaintia Hills ula ong baka Sorkar ka dang bishar halor kane ka bynta ban jied ïa u Chairman ba thymmai ha ka jaka jong u Bah Paul Lyngdoh.
Haba kren bad ki lad pathai khubor, u Symbud Myntri Rangbah u la ong, “Ki Chairman Regional Committee jong ka Ri-Bhoi District bad Jaintia Hills k idei ki juh bad kam don jingkylla hynrei namar u Chairman ka West Khasi Hills um don shuh ha ka Kynhun Myntri Sorkar namar kata ngi donkam ban bishar shwa ïano ban thung bujli,” ong u Symbud Myntri Rangbah.
Shuh shuh u la ïathuh ba na ka liang ka Meghalaya ka la long kaba pynkhreh ban sdang biang ka jingïakren pynbeit pud bad ka Assam na ka bynta ka kylla kaba ar kaba ïadei bad ki hynriew tylli kiwei pat ki jaka.
“Kumba long haduh mynta, ngi dang ap ïa ka jubab naka liang ka Assam namar ngi sngewthuh ba ki dang bunkam namar ka elekshon kala jan artad hynrei ngi long kiba la khreh ban sdang ïakren biang,” u la ong.
Haba kylli halor ka jinglong jingman ha khappud, u Symbud Myntri Rangbah ula ong “Ngi donkam ban burom mar kylliang. Ho-oid ki don ki jingjia bym ïasngewthuh jingmut hapdeng ar mamla hynrei kine baroh kin nym jia lada ngi ïa burom mar kylliang”.