Khliehriat, Nailur,12: U Bah Reachingson Saingshai uba dei u nongwad RTI halor ka jingbym ïaid beit ka rukom thungkam DSC ha East Jaiñtia Hills District u la iathuh ba u la pyrshang ban ïakynduh ïa u PIO, u Manish Kumar, IAS uba dei peit ïa ki RTI ba u la buh u la ong ba la don haduh khyndai sngi lynter kata naduh ka 4 tarik u bnai nailur haduh mynta ka sngi ka 12 tarik u khlem lad satia ban ïakynduh ïa utei u PIO ban iakren halor ki lai tylli ki RTI ba u la dep buh kiba um pat shym la ioh pdiang ïa ki jubab.
“Ka daw ba nga kwah ban iakynduh ïa u PIO ka long halor ka nongrim ba katkum ka shithi jingpyntip ba la soi da u PIO la bthah ba wan peit ne jurip ïa ka jubab RTI ba la buh naduh ka 21 tarik u bnai naitung 2025, ha ka jingkynduh bad ka dealing assistant myn ha ka 1 tarik nailur namar ba ka la dei ka por ban ioh pdiang ïa ka jubab bad la bthah ban kynduh ïa u PIO bad ha ka jingiakynduh bad u ha katei ka sngi u PIO u la ong pynban ba um don jingtip eiei halor kane bad phah biang ïa nga ban kynduh ïa u DC, ha ka 2 tarik nga la ioh jingtip biang lyngba ka email bad bthah ba ngan leit peit bad bishar ïa ka RTI kaba la buh myn ha ka 31 tarik naitung, ha ka jingioh ban peit ïa ka jubab ba la ioh lyngba ka dealing assistant nga la lap ba kam pat biang ka jubab” ong u bah Reachingson Siangshai.
“Manla ka sngi nga la pyrshang ban iakynduh ïa u PIO bad ngam lah ban iakynduh mynta ka jingkylli ka mih shaei jah u PIO uba kyrteng u Manish Kumar, IAS, hooid nga la ioh jingtip ba u shim shuti hooid kam pher watla u shim shuti tangba balei ki phah wan ïa nga shane man ka sngi, balei ban pynjynjar haduh katne,” u la ong.
“Mynta nga la dep pyntip sha ki sengbhalang ruh halor kane ka jingshem jongnga hangne ha kaba ngam lah ban iakynduh ia u PIO ha ophis u DC ha Khliehriat, mynta ki nongïalam sengbhalang ki la ïa synran lang bad mynta ka sngi ruh u PIO um don, te ki nongialam sengbhalang ki kwah ban iakynduh ïa u Deputy Commissioner ban wad ïa ka jingshisha halor ka jingbym don u PIO wat ïa kane ruh u DC u la shu phah ktien da kaba ong ban wan biang sa la sngi nyngkong, kaei kane?, la kynthoh u Bah Siangshai.
“Lada kum kane ka jia hapoh ka district ngi kum u paidbah ngi lah mo ban pdiang ïa kane ka jingleh ki bor district bad u PIO, kane ka hok ka jong ngi, ngim dei ban pdiang ïa kum kane ka jingpynshad shrieh kine ki heh sorkar, lada kim kwah ban kynduh ki dei ban ong beit da kaba shai, nga kyrpad ïa kiwei kiwei ki sengbhalang ba ngi hap leh eiei halor kane ka rukom treikam ki heh sorkar hapoh ka district jong ngi” ong u Bah Siangshai.
