Nongpoh, Jylliew 28: Da ki spah ngut ki paidbah ba kynthup ruh ïa ki nongïalam jong kiwei kiwei ki seng saiñ pyrthei naki shnong bapher bapher ka thai khappud jong ka Jirang Constituency mynta ka sngi kila leit ban pynïasoh ïalade bad ka party National People’s Party naka bynta ban pynkhlaiñ ïaka party shuwa ka elekshon sha ka iing Dorbar thawaiñ ka jylla ban long ha u snem 2023.
Ha katei ka sngi ka jingwan pynïasoh jong ki nongïalam bad paidbah ha katei ka thaiñ la sakhi ruh da ka jingdon lang u MLA ka Jirang Bah Sosthenes Sohtun, Bah Vitor Ranee MDC, Bah Balawan Syiemiong President ka NPP Jirang bad kiwei kiwei ki riew rangbah bad nongïalam ka party naka thaiñ Jirang.
Lyngba katei ka jingwan pynïasoh jong ki paidbah ha katei ka sngi kan nang pynkhlain shuh shuh ïaka party ha Jirang constituency kaba ioh ruh kham duna vote haka elekshon bala dep.
Haba kren ha katei ka sngi naka liang u Bah Sosthenes Sohtun u la pynpaw ka jingsngewkmen kaba khraw ban iohi ba ki paidbah ha katei ka thaiñ kila sngewthuh halor ka jingtreikam jong ka party NPP ba naka liang jong u kum u MLA u la trei shitom ha kine ki 4 snem bala leit noh khlem shongthaid ban wanrah shibun ki kam pynroi hapoh ka Constituency baroh kawei ban wanrah ki jingkylla ha ka ba ïadei bad ki kam pynroi.
U la ong ruh ba naduh ba u long MLA u buh ka jingdawa sha ka sorkar ba ka dei ban peit kyrpang khamtam sha ki thaiñ khappud ka Jirang Constituency mar syndah bad ka jylla Assam namar ki donkam ka jingïarap jong ka sorkar bad naka liang ka sorkar kala sngap ban ioh ruh ban wanrah ïaki skhim bapher bapher ha katei ka thaiñ.
U la ong ruh ba kum ka party kan dang trei shitom ban dang pynkhlain shuh shuh naka bynta ban ioh kheit ïa u soh ka jingjop ha ka elekshon ban wan ban dang lah shuh shuh ban pyndep ïa kiba bun ki kam ba sahteng ba ki paidbah ki dei ban ioh jingmyntoi.
Naka liang katto katne ngut ki riew rangbah kiba la ai jingkren ha katei ka sngi kila pynpaw ba ngim pat ioh MLA la bun phew snem ba trei shitom bad wanrah ki kam pynroi kumba ba leh u MLA ba mynta u ba la wanrah shibun ki kam pynroi naduh ki lynti syngkien, ki jaka sumar khamtam kitei ki jaka kiba dei ruh ki thaiñ khappud ba ym ju don ba kynmaw ïaki khamtam ban peit ïaka bha ka miet jong ki paidbah.
Kiba bun naki paidbah ha kayei ka sngi kila rai ruh ban pynjop biang ïa u Bah Sosthenes Sohtun kum u MLA ka Jirang Constituency naka bynta shibun ki jingdonkam ban wanrah ki jingkylla ha katei ka thaiñ.
