Nongpoh, Jylliew 28: Katkum ki kyndon ba la pyntreikam ban teh pyrkhing ïa kino kino ki kynhun ne ki riew shimet la ka dei ka jingmane blei ne kiwei ki kam, ka bor District na Ri Bhoi ka la khang pyrshang ban bret ïa kino kino ki kynja blei ba shu thaw ha kino kino ki wah hapoh ka District Ri Bhoi.
Ka kyrwoh na u Deputy Commissioner ka Ri Bhoi, la ong ba kino kino ki kynja blei thaw ba shna na ka bynta ka leh niam la ka long jong kino kino ki kynhun niam ne ki shnong ki thaw shuwa ba kin leh ïa ka niam ka rukom ha ka leh niam ki dei ban ioh jingbit na ka Meghalaya State Pollution Control Board kaba dei ka jingteh kyrkhing ban bret ïa kino ki kynja blei thaw kiba ktah ïa ka khuid ka suba jong ki wah bad ka mariang.
Shuh shuh, la btah ruh ba kino kino ki kynja blei ba shu thaw lade kino kino ki kynhun niam ki leh niam leh rukom kim dei ban leit bret sha kino kino ki wah hapoh u pud u sam ka Ri Bhoi District bad shuwa ba kin leh ïa kitei ki jingleh niam ki lah ban pyntip ruh sha ki nongïalam shnong la ha nongkyndong ne ha ki jaka sorkar bad la btah ruh ba ki hap ban tih lypa ïa ki kynja pung ba shipor na ka bynta ban pyndep ïa ka leh niam ka leh rukom jongki.
La khang pyrshah ban bret ha ki wah ïa kino kino ki kynja blei thaw ba shu thaw da ka kti ne ki kor ki bor ka dei halor ka nongrim ban ïada bad ban nym shah ktah ki wah na ki jingjaboh ki jingma kiba ap ka jingbret pathar sha ki jaka paidbah ne ki wah.
