Shillong, Nailur 04: Ki MLA ka Karnataka Legislative Assembly’s Committee on Public Undertaking ki la ïakynduh ïa u Lamphang ka ïing dorbar thaw aiñ ka jylla u Thomas A. Sangma.
Kane ka jingïalang ka la long ruh kum ka kam kaba kongsan ha kaba ïadei bad ki jingeh ba la mad da ki jylla ha kaba ïadei bad lad jingtip bad kumjuh ruh ban pynkhlaiñ ïa ki kam thaw aiñ hapdeng kine ki ar tylli ki jylla.
Ïa kane ka kynhun ba la mihkhmat na jylla Karnataka la ïalam da u Basavaraj Neelappa Shivannanavar, dkhot ka Legislative Assembly bad u Chairman ka Committee. La synranlang da u Araga Jnanendra, u M.Y. Patil, bad u Allamaprabhu Patil, ha ryngkat lang bad baroh ki dkhot ka Legislative Assembly, ha ryngkat bad ka Umashree bad ka Bharathi Shetti, baroh arngut ki dei ki dkhot ka Legislative Council.
Ha kane ka sngi la synranlang da ki nongmihkhmat kum ka Premalatha Patil, bad u Allamaprabhu Patil.
Kiba la wan ban kyrshan lang ki kynthup ïa ki ophisar bad ki nongtrei ka Karnataka Legislative Assembly, ba kynthup ïa u Harisha, Deputy Secretary, bad ka H. Sudha, Reporter.
Ha ka jingïakren bad u Thomas A. Sangma la ïoh ki jingai jingmut kiba kongsan ha kaba ïadei bad ki kam sorkar bad kumjuh ruh kiwei ki kam kiba donkam ha kane ka jylla.
Ha kane ka jingïalang la wan shim bynta da u Deputy Speaker ka Meghalaya Legislative Assembly, u Timothy D. Shira, ha ryngkat bad ki ophisar ba kynthup ïa u Malthus S. Sangma, Secretary; u Raja Kharpuri, Deputy Secretary; bad u Aurelius Warlarpih, OSD sha u Lamphang ka Ïingdorbar thaw aiñ ka jylla.
