Pan jingpynshai ka JNC na ka sorkar halor ka jingthmu ban siew tulop noh ka sorkar ïa ki nongtrei jong ki ADC

Khliehriat, Nailur 01:Ka Jaiñtia National Council (JNC) ka kwah ban pynpaw ba ha shwa ban ai ka jingkyrshan ne ban ai ka jingpyrshah ka pan jingpynshai na ka sorkar halor ka jingthmu ban siew tulop noh ka sorkar ïa ki nongrei jong ki ADC namar ba ka seng ka la iohi ba u myntri rangbah ka jylla u Conrad Sangma u la pynbna dang shen, ba ka Sorkar Meghalaya kan siew tulop hi noh ïa ki nongtrei jong ki Autonomous District Council.
Halor katei ka mat na ka liang ka seng ka ong ba ka long kaba donkam ban da ka tai sani bha hal or katei ka mat.
“Ha ka jingsngew jong ngi ba ha shwa ba ka party kan rai la ngin kyrshan ne pyrshah ïa kane ka rai jong ka sorkar , ngi donkam ban pan jingshai halor kine ki bynta ba kynthup, ha kano ka paragraph jong ka sixth schedule la thoh bad ka lah mo ban ai bor ïa ka sorkar ba ka lah ban siew ïa ka tulop ki nongtrei jong ki Autonomous District Council? namar kat kum ka sixth schedule kam don kano kano ka provision ba ka sorkar kan siew tulop ïa ki nongtrei jong ki council, hato kane kan ieng ha khmat ka aiñ ?”
“ Kan jia aiu ïa ka bor ba laitluid jong ki ADC (autonomy power of the ADC ). Hato kane kan nym pyntroiñ (dilute ) noh ïa ki bor jong ki ADC ? Hato ka jylla kan nym tular ïa ki kam ki ADC lyngba ki nongtrei , ki nongtrei ki ADC kin sa long ki bym lah ban jubab sha ka sorkar jylla ne sha ka council? Ki jingthung kam thymmai ha ki ADC hap ioh jingbit ne em na ka sorkar jylla? Lada ka sorkar jylla ka siew tulop sa ïa ki dkhot ne members hato ki MDC ki la long ki office & profit jong ka sorkar ne ka jylla?”
Ka seng ka la pan jingpynshai da kaba ong shuh shuh “Ïa kane ka tulop la kin ot bad khate ne em na ka share ki ADC kum na ki Mineral, Transport & Forest ? Hato ka jinglum ïa ka Professional tax, ka state kan dang ai ne em ha ki ADC?”
“Kaba kham kongsan eh ka long ba nangno ka sorkar jylla kan ioh pisa ban pyndap ïa ka tulop jong baroh lai tylli ki nongtrei jong ki ADC?”
Kum ka jingai jingmut ka seng ka la bynrap ba“Ka JNC ka tyrwa katto katne ki lad ki lynti kiba thmu ban ioh ïa ka jingshong shngaiñ ha ka liang ka pisa tyngka na ka bynta ki ADC, ka council ka ngeit ba ki jingai jingmut kin long kiba donkam ba ki ADC ki dei ban pynkhlaiñ ka fund la jong, khnang ba kan nym jia shuh nangne shakhmat haka kam pisa pilaiñ, ki ADC kim dei ban thung kam palat ïa kaba kim lah ban siew, ka sorkar jylla ka dei ban ai jingkheiñ kaba biang ( proper & detail explanation) katno ka lum khajna na ki marpoh khyndew ne mineral, transport & forest, ka dei ban long shai hato katno ka share ki ADC bad katno jong ka state ne sorkar bad ka state ka dei ban ai sha ki ADC ïa ka share khlem da pynslem bad khlem khate” pynkut u kyrwoh na u President rangbah ka JNC-CEC, bah Sambormi Lyngdoh.