Lahduh ka Madanheh East A ha ka (L) Enshon Lamare Phudmuri Interdong Football Tournament 2025 ka SSMP
Shillong, Nailur 01: Ka Madanheh East A ka la ïoh ban rah ïa ka khusnam lahduh jong ka (L) Enshon Lamare Phudmuri Interdong Football Tournament 2025 ba la pynïaid da ka Seng Samla Mawlai Phudmuri (SSMP), hadien ba ka la lah ban pynliem noh ïa ka Madanheh East B da 1-0 ha ka jingïakhun ïa ka final ha madanheh stadium, Mawlai Phudmuri ha ka sngi Saitjain ka 30 tarik u Nailar, 2025 (taïew ba ladep).
ïa kane ka shi kol na ka bynta ka Madanheh East A la thep da u Banlam Lyngdoh Mawphlang ha ka kyllastep.
Ka SSMP ka la pynlong ïa kane ka Phudmuri Inter Dong Football Tournament kum shibynta na ka jingrakhe ïa ka Ruby Jubilee ne ka jingdap sawphew snem jong ka Seng. ïa kaba ki la ai ai nam ïa kane ka Tournament ha ka kyrteng jong I Rangbah Shnong barim i (L) Bah Enshon Lamare.
Ha kane ka sngi la ïa don lang ruh ka Kong Wonmai Warjri ka Kurim jong i (L) Bah Enshon Lamare kaba la long ka kongsan ha ka jingdon ryngkat lang ki bahaïing hasem, ki kur ki kha, ki Nongialam Shnong, ki Seng Longkmie bad ki para nongshong shnong.
La ïoh ka jingkren shaphang ka jingim jong i (L) Enshon Lamare na u Dr. Sylvanus Lamare uba long u Pyrsa kur jong i bad kumjuh ruh na ka liang ka ïing ba la kren da u Bah Kitbok Lyngdoh Marshillong uba dei u pyrsa kurim jong katei ka longïing.
Ha kane ka sngi la sam ïa ki khusnam sha ki Nongjop da ka Kongsan bad la ai ruh ïa ki khusnam Best Player ia kaba la ioh rah da u Jasson Mawñiuh na ka Dong Madanheh East B, ia ka khusnam Best Goal Keeper da u Harvey Massar na ka Dong Massar, ïa ka khusnam Top scorer la ioh rah da u Kenny Kharbhih na ka Dong Madanheh East A bad ia ka khusnam Discipline team la ïoh rah da ka team na ka Dong Kjatshnong.
Ka Seng Samla Phudmuri ka la pynpaw ka jingsngewnguh kaba khraw ïaka ïing ka sem jong ka Kong Wonmai Warjri kiba la nohsynñiang da ki Trophy bad ki mementos na ka bynta kane ka tournament.
La pynpaw ruh da u President ka Seng Samla Mawlai Phudmuri ba ki dang bun kiwei pat ki jingïalehkai ha ki sngi ki ban wan haduh ban da poi ka sngi pynhap pyrda ïa ka jingrakhe ïa ka Ruby Jubilee jong ka Seng ha u bnai Kyllalyngkot 2026.