Markhmat ïa syllok ka Myntri bad ki samla halor HIV, drok bad ki ishu ba kynrei ha ka jylla

Shillong, Nailar 31 : Ki la don palat 500 ngut ki samla na ka jylla bad kumjuh na ka thain shatei lam-mihngi jong ka Ri kiba la kiew rynsan ha ka sngi Sngi Saitjaiñ ha State Central Library Shillong ha ka rukom kaba khampher ban pynphriang ïa ka khubor kaba ïadei bad ka koit ka khiah.
Ïa kane ka rynsan kaba la tip kum ka – “Youth Uncut: Real Talk on HIV” and “Multiverse Saga 2025 – Cosplay with a Cause,”, ka la khring bha ïa ki paidbah khamtam haba ki samla ki ïoh ban pynpaw shynna ïa ka khubor kaba ki don da kaba mih pyrthei ruh ha la ki riam kiba kham phylla ban pynsngewthuh khambha halor ka ishu HIV, nangta ruh halor ka koit ka khiah ha ka shongkha shongman bad ruh haba ïadei bad u drok bad kiwei kiwei.
Ha ka kylla kaba nyngkong jong ka prokram la sdang shwa da ka jingïakren bad ka jingïasyllok hapdeng ki khun samla bad ki nongthaw ain halor ka phang kaba ïadei bad ka jingai jingpynshai halor ka HIV/AIDS, ka jingshah kiar ha ka imlang sahlang bad ruh ka lad ban ïoh ïa ki jingsumar.
Na ka liang ka Myntri ka Koit ka Khiah ka jylla, Dr. Ampareen Lyngdoh haba ïalam ïa kane ka mat ka la kob ïa ki samla ba ki dei beit ban kylli ïa ki jingkylli kiba long peit phlak phlak ha ka mat da kaba plie lad ruh ïa ki ban ïa kren markhmat ha ka rukom kaban pynhun ym tang ïa ki nongkylli kiba kwah jingshai hynrei wat ïa ki nongsngap ruh.
“Phim dei shuh ban tieng. Ka jingïarap mynta ka don hangne hajan. Phi donkam tang ban shu khnion ai u number 1097,” ong ka Myntri haba kren halor ka phang kaba ïadei bad ka shongkha shongman, ka jingshah kiar bad ki lad ïoh jingsumar. “Ngi donkam ka jingsngewthuh lang ym ka jingsngew synei na ka bynta kito kiba im bad u HIV,” ka la ong.
Ha kawei ka liang, ka Myntri ka la ai ruh ka jingïaroh ïa ka jingpoi pyrkhat jong ki samla ban wan shim bynta ha ryngkat ki riam ba harukom. “Ka pynkmen shisha ïanga ban ïohi ba ki khun samla ki pyni ïa ka jingtbit jong ki bad ruh ban mih ha rynsan ryngkat ka khubor ban pynshai halor ki ishu kum HIV bad u drok.”
Shuh shuh ka la ong ba katei kam dei shuh tang ka jingpyni ïa ka jingtbit jong ki hynrei ka long ruh shi bynta jong ka jingïasyllok. “Nga kwah ban ïohi ba kum kine ki sienjam dei ban pynrung ruh ha ki skul ki college bad ki rynsan jong ki samla. Ngi donkam ka khambun ka jingshngain, bad ki rynsan kiba biang na ka bynta ki khun samla ba kin pyni shuh shuh ïa ka jinglah jong ki bad ruh ban tip kham janai shuh shuh.”
Ha kane ka rynsan la wan ban ïasnoh lang da kiwei ki riewshemphang kynthup naduh u Dr. W.B. Langstieh, Project Director, Meghalaya Aids Control Society (MACS), Bah Wilson Dohling, Deputy Director – Prevention (MACS) , Bah Ajoy Lanong, Deputy Director – Mainstreaming (MACS) bad Dr. L. Myrthong, Deputy Director – Medical (MACS).
Ryngkatlang, kane ka kynhun ka jubab ïa bun bha ki jingkylli kiba wan na kylleng ki bynta khamtam eh ban pynshai halor ki lad jingïada na ka HIV, ka jingktah ïa ka bor pyrkhat na ka jingshahkiar bad ka jingsngew marwei, ka kamram jong ki nonghikai bad ki kmie ki kpa ban tuklar dang kloi bha. Ka jingmih jong ki samla ban ïakhun ïa u drok bad kiwei kiwei ki mat.
Na ka liang ka Myntri ka la kyntu ruh ïa ki nongtrei mon sngewbha bad ki nongïalam jong ki samla ban don ruh ka lympung kaba kyrpang na ka bynta ki samla ba dang khie khnang ba kin lah ban ïa syllok haba ïadei bad ka jingkynduh jong ki ha ka jingim.
Ha kane ka rynsan ka la don ruh ka jingwan sakhi na ki khun samla kiba la lait na ki tyrsim jong ka jingkyrni kiba harukom.