Kyrpad ka Ïingkashari ïa ka SC ban ailad tian bishar ïa ka PIL ka kam ksew ba ïaid wir ha jylla

Shillong, Nailar 31: Ka Ïingkashari Meghalaya High Court ka la kyrpad ïa ka Supreme Court ba kan ailad ha ka ban tian bishar shwa ïa ka Public Interest Litigation (PIL) da kaba kdew ba ka kam ksew ba ïaid wir ha Meghalaya ka kham pher namar ka jinglong ba shyrkhei jong ki ksew, kaba buh ha ka jingma ïa ka jingshngaiñ ki paidbah bad kiwei kiwei.
La ong ba kane ka rai jong ka Ïingkashari ka la mih hadien ba ka Supreme Court ka la bthah ban phah lut ïa ki kaiphod PIL halor ki ksew ïaid wir na baroh ki Ïingkashari High Court sha ka ba kan bishar.
Shuh shuh ka division bench ba kynthup ïa u Chief Justice IP Mukerji bad Justice W Diengdoh ha ka hukum ba pynmih ha ka sngi Saitjaiñ ka 30 tarik Nailar ka la ong, “Watla ki don bun kiei kiei kiba long kumjuh hapdeng ka mudui ba ïadei bad ki ksew ïaid wir ha ki Ïingkashari High Court bad ha Supreme Court, ngi sngew ba ka dei ka kamram jong ngi ban kdew hangne ba ha kane ka Jylla, ka don ka jingïapher ha ka jingma kaba ki buh da ki ksew ïaid wir.
“La pyntip sha ngi ba bun na ki ksew ïaid wir ki dei ki ksew dait briew bad kiba kynrup kulmar. Ha surok, lynti ïaid bad jaka paidbah, ki kynrup kynsan kynsan ïa ki briew bad ha bun ki khep ki pynmynsaw jur. Haba dep sngap ïa ki jingpyntip ha kane ka PIL, ngi sngew, nalor kiwei pat, bthah ban kem ïa kine ki ksew da ki bor Sorkar, ban ai dawai, injek ïa ki bad sa buh ha ki jaka sah ba shna kyrpang ïa ki ban ïoh peit thuh shuwa ban pyllait pat ïa ki. Namar ka jinglong jong kine ki ksew, ban pyllait ïa ki khlem ka jingsngewhun ba kim dei shuh kiba dait briew, bad ailad ïa ki ba kin ïaid ha ki jaka paidbah, kan buh ha ka jingma ïa ki paidbah”.
Shuh shuh la ong, “Namar kine kiei kiei, ngi bthah ïa u Registrar General kane ka Ïingkashari ba un phah ïa ka aplikeshon bad pan ïa ki jingbthah haba ïadei bad ka jingailad ban shong bishar ïa ka PIL ha kane ka Iingkashari.”
Shuh shuh ïa kane ka PIL yn sa buh ban wanrah biang ha ka 15 tarik Risaw, 2025, ban ïoh pdiang ïa ka kaiphod na u Registrar General halor ka jingmih jong ka aplikeshon ba la phah sha ka Supreme Court.