Khliehriat, Nailar, 31: Lai tylli ki dorbar shnong kiba kynthup ïa ka shnong Chiehruphi, Thangskai bad Wahïajer Narpuh ki la rai ban ai ka jingkyrshan pura ïa ka public hearing jong ka Meghalaya Cement Limited, East Jaiñtia Hills District ka ban sa long ha ka 5 tarik, Nailur 2025 halor ka jingthmu ban khlong ïa u mawshun na Mooiong-Thlusniang, Chiehruphi na ka jaka kaba heh 26.5 hectare.
U kyrwoh ba la phah da u Chairman Lai shnong u Bah Ïaidmon Bamon bad u Secretary Lai shnong u Bah Khangbor Rymbai ki la ong bad pynshai ba ka jingkyrshan jong ki ïa ka public hearing ka long katkum ka rai jong ka Dorbar pyllun jong ki lai shnong kiba kynthup ïa ka dorbar shnong Chiehruphi, Thangskai bad Wahïajer Narpuh kaba ki ladep ban pynlong ha ka 24 tarik, Naitung, 2025.
Ki la ong shuh shuh ba ka nongrim ba ki la ai jingkyrshan ka long namarba ki ladep ban ïateh ïa ka soskular bad ka Meghalaya Cement Limited ha kaba ïadei bad ka roi ka par, ka ïohkam ïohjam bad kiwei kiwei ki kam pynroi ha ki shnong ki thaw.
Ki nongïalam jong ki lai Dorbar Shnong ki khot bad wer ruh ïa ki paidbah, ki paralok najan bad na jngai, ki riewpawkhmat, ki riew rangbah, ki sengbhalang ban ïasnohkti lang bad ki Dorbar Shnong ha ka public hearing ka ban sa long.
