Shillong, Nailar 28: Ka Indian National Congress (INC) ha ka sngi Palei ka la leit buh ïa ka jingujor ba thymmai hakhmat u Lamphang ka Ïingdorbar u Thomas A Sangma, ba dawa ban mait kyrteng noh ïa ki 4 ngut ki MLA jong ka party kiba leit pynïasoh bad phet noh sha ka National People’s Party (NPP).
Ïa kane ka jingujor ba la mudui da u Secretary ka Meghalaya Pradesh Congress Committee (MPCC) u Bah Manuel Badwar la aiti sha u Commissioner & Secretary ka Assembly u Bah Andrew Simon uba la pdiang na ka bynta u Lamphang jong ka Ïingdorbar Thaw Aiñ.
Katkum ka jingong u Bah Badwar, ka jingujor ka dei kaba la pynshong nongrim ba kane ka jingpynïasoh bad phet seng ki MLA kam shym la ïaid katkum ka kyndon ar-lai bynta ka jingdon paid ba donkam.
La ong ba ïa kane ka jingujor la mudui hapoh ka Rule 6 jong ka Meghalaya Legislative Assembly (Disqualification on Ground of Defection) Rules, 1988, kaba pule lang bad ka para 2(1)(a) jong ka Tenth Schedule ka riti synshar ka ri India, 1950.
Kane ka jingujor ka la wan hadien ba u MLA ka Mylliem u Bah Ronnie V Lyngdoh ula mih noh na ka Congress bad weng noh ïa ka jingujor ba la mudui sha ka Ïingkashari Meghalaya High Court kaba long pyrshah ïa ki laingut ki MLA u Dr Celestine Lyngdoh (Umsning), Charles Marngar (Mawhati) bad Bah Gabriel Wahlang (Nongstoiñ).
U Bah Ronnie V Lyngdoh ula leit pynïasoh sha ka NPP kaba don ha ka Liang Synshar ha ka 30 tarik u Naitung katba ki laingut ki MLA kila leit ïasoh ha ka 19 tarik Nailar 2024.
Na ka liang u Lamphang ka Ïingdorbar ula dep ai ka jingithuh ïa ka jingpynïasoh kine ki 4 ngut ki MLA sha ka NPP.
Lah ban pynkynmaw ba ka Congress kaba jop 5 ngut ki MLA ha ka elekshon Assembly 2023, ka la sah nod ha ka Ïingdorbar ba 60 ngut ki dkhot. Na kine ki 5 ngut, u Saleng A Sangma, ula iehnoh ïa ka kam MLA ka Gambegre hadien ba ula shah jied kum u MP Lok Sabha ka Tura.
“U Lamphang un sa shong bishar ïa ka jingujor bad un sa ai ïa ka rai jong u. Lada ka Congress kam pat sngewhun ïa ka rai u Lamphang, ka lah ban leit tied ïa ka jingkhang ka Ïingkashari,” ong u Bah Simon.
Haba ïakren bad ki nongthoh khubor hadien ba la dep buh ïa ka ujor, u Bah Badwar ula ong ba ka rai jong ki MLA ban iehnoh ïa la ka party kam shym la ïaid satia katkum ka aiñ, naba arngut ki MLA kila kynthih shuwa nyngkong na ka jhad, bud sa uwei hadien 48 kynta, katba uba saw u dang pynkhreh ban mih.
U Bah Badwar ula ong, kane kam shym ïahap kat kum ka kyndon ba 66% lane 2 na ka 3 bynta ka jingdon paid ba donkam ban leh ïa kane ka kam.
“Ka INC ka ïakhun ïa kane ka mukotduma ym ban pynhiar kput ne jingbuhshun hynrei namar ka ngeit ha ka jingbat ïa ka aiñ jong ka Ri,” ula bynrap.
Haba ïathuh ba ka riti synshar paidbah ka don ha ka jingma bad ka jingleh jong kine ki MLA ka long pyrshah ïa ka Riti Synshar ka Ri India, u Nongïalam ka Congress ula ong ba ka party ka thmu ban pyni ba ki MLA kim dei ban kheiñ dewthala ïa ki party ne ïa ka jingjied jong u paidbah.
