Ki jingeh ba la mad da ka GHADC kim dei ban sahkut tang ha ki ophisar ne saiñ pyrthei: Lat

Shillong, Nailar 28: Ki nongmihkhmat kiba kynthup ïa ki samla pule, ki sengbhalang bad ki muktiar ki la kynduh ïa u Lat ka jylla u CH Vijayashankar ban batai ïa u shaphang katto katne ki jingeh bad ki jingma ba la mad ha Garo Hills.
Ka mat kaba hakhmat eh kaba ki la pynpaw ïa ka jingsngewkhia ka dei ka jingduna ka pisa kaba la ktah ïa ka Garo Hills Autonomous District Council (GHADC), ha kaba ka daw kaba hakhmat eh kadei ka jingpynslem bad ka jingbym pynlait thikna ïa ka pisa.
Ki la ïathuh ruh ba ki nongtrei ka Council ki la ïakhih pyrshah namar mynta la jan 4 snem ki la duh ïa ki tulop napoh ka GHADC. Kitei kiba la leit ïakynduh ïa u Lat ki la pynpaw ha u Lat ba ka pisa kaba la pynlait da ka sorkar pdeng la bat noh da ka sorkar jylla, kaba dei ka pisa ban pynpoi sha ki ADC.
Ha ka kyrwoh khubor hadien ba ki la ïakynduh ïa u Lat, ki la ïathuh ba u Lat u la ithuh ïa kane ka jinglong jingman bad u la pynpaw ba ka pisa kam dei ban sahkut tang ha ki ophisar (bureaucratic) ne ki seng saiñ pyrthei. U la pynthikna ba dalade hi un bishar ïa kane ka kam bad pynthikna ba ka pisa kaba dei jong ka GHADC dei ban pynlait ha ka por kaba biang bad ha kaba shit ba shai. U la ong ba halor ka Finance Commission na ka bynta ki ADC yn sa pyrkhat bha. U la ong ba da kane ka commission, lada la ithuh, kan pynthikna ïa ka jingsam bha kaba ïaid beit, ka jingïaid hok ka jingpyndonkam ïa ka pisa bad ka jingleh audit ïa ka pisa jong ki ADC, pynpaw ka kyrwoh khubor.
Ka mat kaba ar ka dei ka jingïada ïa ki aiñ ki longshwa manshwa jong ki Garo. U Vijayashankar u la pynthikna ba un ai ka jingkyrshan ïa ka committee ba la thaw da ka GHADC ban bishar halor ka lawei jong ka aiñ custom ki Garo ba kan ïoh ka jingmynjur bad ban pyntreikam ïa ki ha ka jingïasyllok bad ka sorkar jylla, ki riewshemphang, ki stad jong ka aiñ bad ki nongri nongsumar ïa ka kolshor ki paid Garo.
Halor ka pule puthi, kitei kiba leit kynduh ïa u Lat ki la pynpaw halor ki rukom pynïaid kam jong ka Mendipathar College kaba ha North Garo Hills. Ki la ïathuh ha u Lat ba kane ka college ka la kylla long ka jaka treikam ba la shah kynnoh ba kam long shuh kaba ïaid beit, nangta ka don ka jingshahliang bad ka jingpyndonkam bakla ïa ka ophis, ha kaba u Lat u la ïathuh ba un sa bishar bha halor kane ka bynta.
U Lat u sngap la sngew ruh halor ki jingeh ba la mad da ki samla pule ka NEHU Tura campus. Ki la ïathuh ha u Lat ba kane ka Tura campus ka la shah iehbein lah da ki snem haba ïanujor bad ka Shillong campus.
Halor kane u Lat u la ong ba un rah ïa kane bad ki bor ba dei khmih khnang ba kan don ka jingbhah pisa kaba ïaryngkat.
Kiwei ki mat ki long halor ka jingker sainar shiah ha shilynter ka khappud India Bangladesh khnang ban lah ïada na ka jingwan rung tuh bad beaiñ ki mynder ri bad kumjuh ruh ban khanglad ïa ki kam khaïi beaiñ bad kiwei kiwei.