Ka Youth Parliament ka pynsuk ïa ki khynnah pule ban tip ïa ki kam ka Ïingdorbar Thaw aiñ: Agatha

Shillong, Nailar 24: Ka Jawahar Navodaya Vidyalaya (JNV), Williamnagar, ka la pynlong ïa ka 27th. Youth Parliament Competition, 2025, ha Multipurpose Hall ka JNV, Williamnagar, ha kaba ka Chairman jong ka Meghalaya State Commission for Protection of Child Rights, ka Agatha K Sangma ka la long ka kongsan ha ka jingïadonlang Deputy Commissioner East Garo Hills Deputy Commissioner, RP Marak, u Principal ka JNV, Williamnagar, Ravi Kant, Principal ka JNV, Baghmara, u PK Gupta, ki heh ophisar ka district bad kiwei ki kynrem ki lyndan kiba la shah khot sngewbha.
Haba kren kum ka kongsan ha kane ka prokram, ka Agatha ka la ïathuh ha ka jingïalang ba ka youth parliament ka dei ka prokram kaba la buh kyrpang da ka Ministry of Parliamentary Affairs kaba la thmu ban pynsuk ïa ki khynnah pule ban tip shaphang ki kam jong ka Ïingdorbar Thaw aiñ jong ka ri bad ban pynshai ïa ki khynnah pule bad ban ïarap ïa ki ban kyntiew ïa ka jingdon jong ka jinglong ki nongïalam.
Haba kren shaphang ka jingmad jong ka ban don bynta jong ka hapoh ka Ïingdorbar Thaw aiñ jong ka ri, ka la kyntu ïa ki khynnah pule ban shemphang shaphang ki jinglong ban long ki nongïalam hapoh ka imlang sahlang bad ban tei ïa ki jingshaniah jong ki ban long ïa kaei kaba ki kwah ban long.
Katba Chairman ka East Garo Hills Jawahar Navodaya Committee bad Deputy Commissioner, RP Marak, haba kren shaphang ka youth parliament bad ki jingdonkam jong ka, la ïathuh ruh shaphang ki jingshah ktah na ki jingdih pynbuaid na u drok bad kiwei pat ki jingdih kiba sniew bad kyntu ïa ki khynnah pule ban jngai na kine ki jingdih pynbuaid kiba ktah ïa ka koit ka khiah.
Kham ha shwa na ka liang principal ka JNV, Williamnagar, haba ai ïa ki kyntien pdiang sngewbha, la pynshai ïa ka jingthmu bad ka jingdonkam ban pynlong ïa kane ka youth parliament.