Mawkyrwat, ‘Nailar 24: Ka United Democratical Party (UDP) South West Khasi Hills District ha ka sngi Saitjaiñ ka la pynthymmai ïa ki nongkitkam ha kaba u MLA ka Ranikor Constituency u Bah Pius Marweiñ u la shah jied kum u President bad u Bah Jeslan Roy Nongsiej u la shah jied kum u Secretary.
Ïa ki nongkitkam ba hakhmat bad ki dkhot ba thymmai la pynskhem da u President ka UDP Bah Metbah Lyngdoh ha ryngkat ka jingsakhi lang u General Secretary Bah bah Titostarwell Chyne ha ka jingïalang ba la pynlong ha Dorbar Hall Mawkyrwat, nalor u MLA ka Mawkyrwat Constituency u Bah Renikton Lyngdoh Tongkhar, u Bah Robertjune Kharjahrin bad kiwei kiwei.
Haba kren ha ka jingïalang, u Bah Metbah Lyngdoh ula pynpaw ka jingsngewkmen ban ïohi ïa ki nongïalam jong ka party hapoh ka South West Khasi Hills namar da ka jingsngewshngaiñ ka mynsiem ba ki don ïa ar ngut ki MLA na ka UDP kata u Bah Renikton Lyngdoh Tongkhar bad u Bah Pius Marweiñ, ki riew rangbah bad ki paidbah kiba dang don la ka nongrim ba skhem ha kaUDP kaba dei kawei na ki party riewlum bad ngeit skhem ba kane ka tnad treikam ba thymmai kan nang lehbha shuh shuh ha kine ki snem ba dang wan ban pynkhlaiñ shuh shuh ïa ka party UDP.
