Kwah ki nongkyrshan u Bah Sunshine Makri ban ïakhun na ka UDP na Umsning Constituency ha elekshon 2023

Nongpoh, Jylliew 27: Da ki hajar ngut ki paidbah kiba dei ki nongkyrshan bad nongïalam ba hakhmat jong u Bah Sunshine Makri u ba don mynta haka shatri jong ka Umsning Constituency People’s Forum (UCPF) mynta ka sngi kila mih paidbah haka General Meeting kaba la long ha Nongthymmai Umsning ban shim ka rai naki paidbah na kano ka party kaba ki kwah ba un ïakhun haka elekshon sha ka iing dorbar thawaiñ ka jylla ha u snem 2023.
Ha katei ka jingïalang naka liang ki ki nongkyrshan ba hakhmat jong u Bah Sunshine Makri kila ai ïaka rai bad pynpaw ba u dei ban ïakhun naka party United Democratic Party (UDP) kaba haduh mynta ka party UDP kam pat pynbna ticket na Umsning Constituency, ha kaba naka liang ki nongkyrshan kila pynpaw ka jingsngewhun da kaba ïa rah kti ha katei ka sngi.
Haba kren ha katei ka sngi naka liang ki nongïalam ba hakhmat ka Umsning Constituency People’s Forum (UCPF) naduh u Bah RB Shadap President bad kiwei kiwei ki nongïalam kila pynpaw ba katei ka jingkynduh ha katei ka sngi ka dei tang ki nongïalam naki unit bapher bapher Umsning Constituency ban ioh ïaka rai jong ki na kano ka party ban ïakhun ban pynkhreh ruh shaid shaid ïaka elekshon ban wan, namar kumba long mynta utei u kyrtong u dang don ha katei ka kynhun UCPF bad kum ki nongkyrshan ba radbah ki kwah ba un ïakhun naki party ba kham paw haka jylla kiba don ruh ka nongrim ba skhem ban trei naka bynta ki paidbah.
Ki la ong ruh ba katei ka jingïalang ka dei tang ka jingkwah ban shim ka rai naki nongïalam bad kam pat dei ka jingïalang paidbah, hynrei kila pynpaw ka jingsngew kmen kaba khraw ban iohi ba ka sur jong ki nongïalam ka sawa jam ha katei ka sngi bad ka jingartatien naka liang ki paidbah kila ai ka rai ba dei ban ïakhun beit naka party UDP. Lyngba katei ka sngi naka liang ki nongïalam ki kyrmen skhem ba ka party UDP kan phai khmat sha u Bah Sunshine Makri naka bynta ka tiket ha kane ka elekshon ban wan ban ïakhun na Umsning Constituency.