Jowai, Jylliew 27: Kawei na ka kynhun treimon sngewbha ka ‘Better Life SHG’ Iawmusiang Jowai mynta ka sngi kala plie paidbah ïa ka ïew ïadie ïa thied kaba la tip kum ka “1st International Mega Trade Fair” ïa kaba la pynlong ha Chutwakhu Indoor Sports Hall, Jowai
Kane ka ïew Trade Fair kan sdang naduh mynta ka sngi 27 tarik u Jylliew haduh ka 19 u Naitung 2022. La ïathuh ba ki mar ki mata kiba bun jait kin wan die hapoh kane ka ïew naduh ki shuki, palong (jingthiah), ki tier shet, ki jaiñ ba bun, ki dawai pynbhabriew, ki tiar light, ki jingdieng kpieng, ki tiar jingthaiñ, ki jingbam ba bun jait, ki tiar ïalehkai jong ki khynnah bad kiwei de ki mar bala wanrah nabar kum na Afghanistan, Thailand, Bangladesh bad na kiwei de ki Ri.
Hashwa ban plie ïa kane ka Mega Trade Fair la don ka jingïalang ba lyngkot ba la pynïaid da u Secretary ka Betterlife SHG Iawmusiang Jowai ma Raj Passah, ha ka jingdonlang ka kongsan kong E. Shylla ka Secretary Executive Member JHADC, u Dr. H.H. Mohrmen, u B.R. Marak officer incharge ka Jowai Police Station, ma Eddystone Shylla lem bad kiwei de.
Ka kong Shylla haba ai jingkren kala ai ka jingïaroh ïa ki nongpynïaid jong ka Better Life SHG kiab la treishitom ban wanrah kum kane ka ïew ba heh hapoh ka sor Jowai bad kane ka long ruh ka jingmyntoi ïa ki paidbah ba kin ïoh thied ïa ki mar ki mata kiba wan napoh ka Ri bad nabar kumjuh.
Haoid kane ka long ka sien kaba nyngkong hynrei ka kitbok kitrwiang ïa katei ka seng ba kan nang ïai treishitom na ka bynta ki kam ba bha haka imlang ka sahlang, ka khot ruh ïa ki nongshnong ba najan bad najngai ba kin wan sha kane ka ïew ïadie ïathied.
U Dr. H.H. Mohrmen ula ong ka jingwan kum kine ki ïew Trade Fair na kylleng ki jaka kan ïarap shibun eh ban ïoh ïa ka lad ha kaba ban ïa phylliew jingmut lang bad ki briew ba nabar halor ka rukom ïadie ïathied. Ula ong ba kane ka long ka jingsdang hynrei kynmen ba kane ka seng kan dang lah ban pynlong kum kane ka ïew sha kiwei de ki jaka.
