Shillong, Nailar 23: Ka jingdap kaba 59 snem jong ka seng AWWA kaba don ha Shillong kaba hab hapoh ka 101 Area la rakhe da ka jingshitrhem bad da ka jingkmen. Ïa kane ka sngi la aiti ban rakhe da ka mynsiem ka jingïalong kawei, ka jingsngewkmen bad kumjuh ruh da ka jingmut ban pynkupbor kaba ka AWWA kaba la hikai naduh ba la seng ïa ka, ha ka snem 1966.
Ïa kane ka jingrakhe kaba long shi taïew kynthih ka la sdang da ka Walkathon ba la pynbud da ka Har Ghar Tiranga Bike Rally. Ban pynkut ïa kane ka sngi, ki la don ki cultural programme, ki prokram pynkupburom, ki jingai jingsumar, ki jingkren kiba ai mynsiem, ki jingpyninam.
Ka la don ruh ka jingpynleit jingmut kaba kyrpang halor ki kam ka pule puthi, ka jingkyntiew ïa ki sap ki phong, bad ka bha ka miat jong ka Veer Naris, ka la don ruh ka jingleh kyrpang ïa ki khynnah, bad ki longïing da kaba ai ruh ka jingithuh kyrpang ïa ki shipai kiba la shong thait.
Haba kren ha kane ka sngi, ka Nivedita Malik, Regional President ka AWWA ka la pynpaw ïa ka bynta kaba kongsan jong ka AWWA ha ka ban pynkhlaiñ ïa ka bha ka miat jong ka ïing ka sem ki shipai khnang ba kin sngew ïa ka jingïalong shipara.
Ka la ïaroh ruh ïa ki jingpyrshang jong ki dkhot ka AWWA halor ki jingaiti bad nonsynniang ba khlem da thew ïa ka malade na ka bynta ka roi ka san jong ka kynhun, nangta ka jingpynkupbor ïa ki longkmie bad ka bhah ka miet ki khyllung khynnah.
Kane ka sngi ka pynkynmaw ïa ka jinglong ba ïaryntih, ka bor bad ka jingïalong kawei jong ki shipai bad ka bynta ba kongsan jong ka AWWA ban pynriewspah ïa ki jingim lyngba ka bha ka miat, ka jingsngew synei bad kiwei pat ki kam shakri.
