Lada ai jaka hajan bad u Border Line ngim pyrshah, ha ki jaka ba shong briew te em: FKJGP

Mawkyrwat, ‘Nailar, 19: Ka Federation of Khasi Jaiñtia & Garo People (FKJGP) jong ka South West Khasi Hills District, ha ka sngi Baar ka la leit ban ïa kynduh ïa u Syiem ka Hima Maharam Syiemship ban ai jingmut ïa u ba lada u don jingthmu ban ai jaka ïa ki shipai Border Security Force (BSF) ha Sohbajram Phutmula.
Ka seng ka kren da kaba shai ba kan nym pyrshah lada ai hajan jong u Border Line kaba lait na ki jaka ba ki paradoh para snam ki rep bad ki shong ki sah, hynrei lada ai ha ki jaka ba shong ba sah bad don ki jaka rep jong ki para doh para snam na ka liang ka Seng da lei lei kan nym shah bad kan nym ai lad satia.
Lah ban kdew ruh ba kane ka jingleit jong ki ha khmat u Syiem ka dei ruh hadien ka jingwad bniah ïa ka jinglong jingman jong ki paidbah nongshong shnong ka ka hima Maharam kiba shong ha khappud Bangladesh, naduh Khatphra, Sohbajram Phutmula shaduh Phutkroh, halor ka jingthmu ban ai jaka ïa ki shipai BSF ha kitei ki jaka.
Yn tang kata, na ka liang ki paidbah kiba shong ba sah ha ki tei ki jaka ki la ud la nam bad ki la pynpaw ïa ka jingsngewdiaw namar ba lada ka Dorbar Hima Maharam kan ai duh noh ïa kitei ki jaka sha ki shipai BSF, kane kan long ka jingduh-nong bakhraw ïa ki paidbah nongshong shnong kiba rep ha kitei ki jaka.
Namarkata, ka FKJGP ka la dep ban pyrkhat sani bha halor kane ka kam na ka bynta ka ïap ka im bad ka jingmyntoi na ka bynta ki paidbah kiba long ki para doh para snam jong ka jaidbynriew da kaba ong ruh ba ka FKJGP kan nym khang lada ka Dorbar Hima kan ai jaka ïa ki shipai BSF kiba long ki nongïada ïa ka Ri, hajan jong u Border Line kaba lait na ki jaka ba ki paradoh para snam ki rep bad ki shong ki sah, hynrei lada ai ha ki jaka ba shong ba sah bad jaka rep ki para doh para snam na ka liang ka Seng da lei lei kan nym shah bad kan nym ai lad satia.
Kumta, ka Seng ka kyrpad ïa u Syiem bad Hima, ba kum u kpa uba long u khliehduh ka Hima Maharam ba un sngewbha ban sngew bad sngap lem ïa ka ud ka nam u khun u hajar ka Hima da kaba pynsangeh noh ïa kane ka jingthmu ban ai jaka sha ki shipai BSF ha ki jaka ba jan bad ki shnong briew namar kan long ka jingthut ha ka leit ka wan jong ki paidbah.
Kiba la donlang ha kane ka sngi ki long naduh u bah Keness Nonglait, President, FKJGP South West Khasi Hills District, u bah Teinam Nongtnger, General Secretary, FKJGP Ranikor Circle, u bah Enbor Syiem, General Secretary FKJGP Mawkyrwat Circle ha ryngkat ka jingsynranlang jong ki dkhot na ka Mawkyrwat bad Ranikor Circle.