Dawki, Nailar 18 : Ki tnat sorkar pdeng kiba kynthup ïa ka Land Port Authority of India, the Bureau of Immigration, the Border Security Force, ki paid nongshong shnong bad ka Earth Tree Enviro kaba pyntreikam ia ka project Regeneration Meghalaya kila ïashim bynta ban lehkmen Independence Day kaba 79, ha Dawki Land Port. Hadien jong ka jingrakhe sngi lait luid kaba la long ha ka 15 tarik u Nailar ha ka conference hall la don ruh ka jingthung dieng ha sawdong ka Dawki Land Port.
Kane ka jingrakhe sngi laitluid kaba kyrpang mynta ka sngi ka dei da ka jingïatreilang hapeng ka LPAI, Dawki bad Earth Tree Enviro Company Ltd, Shillong kaba la pyntreikam ïa ka project Regeneration Meghalaya (RM).
Haba lamkhmat ïaka jingïalang u Dr. H.H Mohrmen ula ong ba ka jingthmu ban pynitynnad bad pynjyrngam ïa ka Land Port ka dei kaba donkam bha namar ka Land Port ka long kum ka khyrdop ksiar ia ki paramarjan jong ngi na Bangladesh kiba wan sha Meghalaya bad sha ka ri India. U ai khublei ïau TC Chako uba long kum u Regional Administrator, Land Port Authority of India, Dawki uba la saiñdur bad trei shitom ban pynlong ïa kane ka kad kaba itynnad.
U Sunny Donkupar Mawïong uba long u Director jong ka Earth Tree Environ ula batai shaphang ka project Regeneration Meghalaya bad pynpaw ruh ka jingsngewkmen ba ki shnong, ki kur bad dang shen ka Jaintia Hills Autonomous District Council ruh kala wan shakhmat ban ïatreilang bad kane ka project. Ka jingïatreilang bad ka Land Port Authority, Dawki ka dei uwei pat u mawmer ïa ka project ha ka jingpyrshang jong ka ban pynbha bad pynim biang ïa ka khyndew bad ka mei mariang haka jylla Meghalaya.
Ka jingïatreilang bad ka project Regeneration Meghalaya kala wan ha ka por kaba biang namar ka jingangnud ka long ban pynitynnad ïa kane ka kad khappud ong u TC Chako Regional Administrator LPAI, Dawki. U kyrmen ba kane ka jingïatreilang kan ïarap ban pynurlong ia kane ka jingthrang ban pynjyrngam ïa kane ka kad. U Captain Dan Singh, Company Commandant, BSF Dawki ula pynkynmaw ïa ki kyntien u Myntri Rangduh ka ri u Narendra Modi uba kyntu ïa ki nongshong shnong ban thung shitynrai u dieng kum ka dak ban pynsah kynmaw ïala ka kmie.
U Chief Immigration Officer, Dawki Land Port, u P.S. Thombing, ula pynkynmaw ba ka Meghalaya ka long lupa kaba jyrngam bad itynnad kumta ka dei ka kamram jong ki nongshong shnong ban pynneh pynsah ïa kane ka jinglong jong ka mariang. La ïoh ruh ka jingkren na ka Senoba Khonglah bad la pynphuh pynphieng ïa kane ka sngi da ki jingshad bad jingrwai na ki khynnah jong kane ka thaiñ.
La pynkut ïa ka jinglehkmen da ka jingïathung dieng da ki riewpawkhmat kiba ïadonlang ha ka jingïalang.
