Khliehriat, Nailar, 17: Ki Pulit ka Anti-Narcotics Task Force (ANTF) Meghalaya ryngkat ka jingïatreilang bad ka kynhun Pulit ANTF na East Jaiñtia Hills District naduh ka miet sngi Saitjaiñ ka taiew baladep ki la pynlong ka jingpynap shrip ha ki ar tylli ki jaka ki la ïoh kurup ïa u drok ba shongdor kumba T4.40 klur bad kem noh ïa ki saw ngut ki snar khaii drok.
Ha ka jingïoh kurup na Umkiang, u Superintendent of Police ka East Jaiñtia Hills District u Vikash Kumar u la ïathuh ba ka jingpynap shrip ha ka Sngi u Blei ha Umkiang kaba hap hapoh ka Lumshnong Police Station naduh ka por 11:00 baje mynmiet jong ka sngi Saitjaiñ ki Pulit ki la ïoh kurup haduh 80 tylli ki synduk thep sabon ba la thep da u drok heroin uba khia kaba 961.33 gram.
Ki Pulit ki la kem noh ïa ki lai ngut ki kynthei kiba rah ïa u drok kiba la tip kyrteng kum ka Kimnei, 33 snem ka rta, ka Dimkhothing, 47 snem ka rta bad ka Ngaiting 40 snem ka rta kiba dei na ka shnong Khongjom, kaba hap hapoh ka Tengnoupal Police Station, Manipur.
U SP u la ïathuh ba ïa ki lai ngut ki kynthei ki la shong da ka kali Maruti Suzuki S-Presso bad ka jingpynap shrip ha Umkiang ka long hadien ba la ïoh jingtip ba ki don lai ngut ki kynthei kiba mih na Churachandpur, Manipur ban leit sha Shillong ba la suba jur ba ki kit ïa u drok bad pyrshang ban khaïi beaiñ bad la suba jur ba ki dei ki snar nongkhaïi drok kiba ju mlien ban leh ïa ki kam sniew ha kaba khaïi drok na jylla Manipur sha Shillong lane ba ju tip ruh kum kita ki Inter-State Gang kiba khaïi drok beaiñ na Manipur sha Shillong bad pynpoi drok wat shaduh kiwei kiwei ki jaka jong ka ri India.
Hakhmat ka jingsakhi lang jong ki riew paidbah la pynlong ïa ka jingkhynra hapoh ka kyndon ne Section 50 NDPS Act.
Ïa u drok la lap ba la thep ha ki saw tylli ki pla ha kaba ïa ki 80 tylli ki synduk thep sabon ba la thep ïa u drok la thep hapoh ki pla bad u drok u dei uba shongdor haduh T4. klur lada die ha ki ïew beaiñ bad hadien ba la dep test la lap ruh ba u dei u drok herion.
Ïa ka ejahar la rejistar ha Lumshnong Police Station bad la pynngat hapoh ki kyndon ain jong ka NDPS Act bad ka jingtohkit ka dang ïaid ban lap ksai shuh shuh.
Ha kawei pat ka jingïoh kurup drok, ka kynhun Pulit ANTF East Jaiñtia Hills District kaba la ïoh jingtip na ki tnat syntiat ryngkat ka jingïatreilang bad ka kynhun ki Pulit Anti-Narcotics Task Force (ANTF), Meghalaya ha ka sngi Saitjaiñ naduh ka por 10:00 baje mynmiet ki la pynlong ka jingpynap shrip ha Byndihati kaba hap hapoh Khliehriat Police Station.
Dei tad haduh ka por 2:15 baje noh sngi ha ka sngi u Blei ba ki Pulit ki la ïoh bat ïa kawei ka Bus kamai kaba don u nombar AS-01-JC-4999 kaba wan na ka thaiñ Silchar bad kaba dang thmu ban leit sha Shillong bad na kane ka bus ki Pulit ki la ïoh bat ïa uwei u briew uba la tip kyrteng kum u Isak L. Joute, 26 snem ka rta uba sah ha Madanriting, Shillong, East Khasi Hills.
Na u Joute ki Pulit ki la ïoh kurup ïa u drok iba khia 91.86 gram ba la thep hapoh ki 9 tylli ki synduk thep sabon bad la ong ba u drok ba la kurup na Byndihati u dei uba shongdor kumba T.40 lak tyngka lada die beaiñ.
Dei ha ka miet sngi Saitjaiñ ba ki Pulit ki la ïoh jingtip ba u Isak L. Joute un sa mih da kawei ka Bus ba kit ïa ki nongleit jingleit na Churachandpur, Manipur ban wan sha Shillong bad la suba jur ba u kit lang ïa u drok.
Hadien ba la ïoh kurup ïa u drok ha ryngkat ka jingdonlang jong ki riew paidbah kum ki nongsakhi la pynlong ïa ka jingtalasi bad lap ïa u drok bad hadien ba la test la pynshisha ba u dei u drok Heroin.
Ki Pulit ki la kem ïa u Isak L. Joute bad ïa ka ejahar la rejistar ha Khliehriat Police Station bad la pynngat hapoh ki kyndon aiñ jong ka NDPS Act.
Kat haduh ba la pynmih ïa kane ka khubor ka jingtohkit ka dang ïaid ban lap ksai shuh shuh ïa kiba donkti.
