Shillong, Nailar 16: Ka BSF Senior Secondary School, Shillong, sa shisien pat ka la ïoh bat biang ïa ka nam jingjop kaba la hiar pateng naduh mynshwa halor ka jinglah kynjoh sha ka kiew ka jingnang jingpule bad ka jingjanai ha baroh ki liang, bad ka la ïoh ki jingjop ha ki bynta bapher bapher.
Ha ka jingrakhe ïa ka 79th Independence Day Celebrations ha madan Polo, ka Girls’ Marching Contingent jong ka skul ki la wanrah ka burom ïa ka jaka pule da kaba ïoh ïa ka jingjop ha ka kyrdan kaba ar ha ka jingïakob ïaid march past. Ka jingpyni ïa ka drill ba paka, ka discipline, bad ki jingleh kiba pynphalang ïa ki jingkordor halor ka jingaiti bad jingshah hikai ha ka skul.
Ha ki kam ïalehkai, ka School Cricket Team ka la ïoh ïa ka nam jop ha ka Inter-School Cricket Tournament pyrshah ïa ka Shillong Secondary School-kaba pyni ïa ka jinglah ban ïatreilang kum ka kynhun, ka jinglong sportsmanship, bad ka jingshim ka rai kaba dondor.
Ka skul ka la paw bha ruh ha ka martial arts ha ka All India Meghalaya Inter-School Karate Competition kaba la long ha NEHU SAI Complex, ha kaba u Master Emmanuel B. Diengdoh u la poi ha ka kyrdan kaba 3 ha ka Junior Kumite +55 kg, ka Eliana Haphisa Syiem ka la poi ha ka kyrdan kaba 2 ha ka Junior (ba 11 snem ka rta) hapoh ka 40 kg category, katba u Master Ibanmanbha S. Blah u la poi ha ka kyrdan kaba 1 ha ka under 52 kg category.
Ha ka pule puthi ki samla pule ka skul ki la paw bha ha ka Indian Talent Olympiad, ha kaba u Master Aaron Taid u la paw kum u State Topper ha ka subjek Mathematics, u Master Harsh u la poi ha ka kyrdan kaba 19 ha ka Social Studies, katba ka Cc Ziana ka la ïoh ïa ka kyrdan kaba 16 ha ka Drawing.
Haba pynpaw ka jingsarong halor kinie ki jingjop ba la kynjoh da ka skul, ki bor pynïaid ka skul ki la pynpaw, “Kine ki mawmer ki la long ki jingpynpaw jong ki samla pule jong ngi halor ki jingtrei shitom, ka jinglong discipline, bad ka jingsngewtynnad ïa ka kam. Ngi pynpaw ka jingsngewburom naduh ka dohnud sha ki nongpule jong ngi kiba la aiti naduh mynsiem, nangta ka jingkyrshan ki kmie ki kpa, bad kiba hikai kiba ïaibteng ban pynwandur ïa ka lawei ki khun jong ngi.”
Ka BSF Senior Secondary School, Shillong, ka la ïai pynskhem ïa ka jinglong aiti ban kyntiew na ka bynta ka jingnang jingstad ki samla ba kin long janai ha baroh ki liang.
