Pyrshah sa ka HANM bad HNYF, ïa ka jingthmu ai jaka u Syiem Hima Maharam ïa ki shipai

Mawkyrwat, ‘Nailar 13 : Ka Hynñiewtrep Achik National Movement (HANM) bad ka Hynniewtrep National Youth Front (HNYF) jong ka South West Khasi Hills District ka la pynpaw paidbah ba ka ïeng pyrshah halor ka jingthmu jong u Syiem ka Hima Maharam ban ai jaka ïa ki shipai ha Photmula kaba hap hapoh ka Ranikor Civil Sub Division, South West Khasi Hills District.
Haba kren ha ki lad pathai khubor, na ka liang ka Hynniewtrep Achik National Movement (HANM) South West Khasi Hills District hapoh ka jingïalam u Lambokstar Marweiñ ka la ai ka jingkyrshan ba pura ïa ka Khasi Student’s Union jong ka South West Khasi Hills District bad pyrshah ïa kane ka jingthmu u Syiem bad ka Executive Dorbar ban ai jaka ïa ki shipai.
Ym tang kata, ka seng ka dap ruh da ka jingsngewkhia kaba khraw namar kine ki dei ki jaka rep jong ki khun ki hajar ka Hima Maharam, namarkata, u Lambokstar Marweiñ u la pynpaw ruh ba ka jingai noh ïa kane ka jaka sha ki shipai kan sa wanrah ïa ka jingduhnong kaba khraw ïa ki khun ki hajar jong ka hima bad khamtam eh ka pateng ka ban sa wan ha ki khun ki kti.
Katba ka liang jong ka Hynñiewtrep National Youth Front (HNYF) jong ka South West Khasi Hills District kaba hapoh ka jingïalam u Shiningstar Wanniang, President bad u Shimborlin Langte ki la leit ban ïa kynduh ïa u bah B. Mawlong, IAS, Deputy Commissioner jong ka South West Khasi Hills District ryngkat ka jingthoh ban kyrpad ban pynkynriah noh ïa ki Border Security Force (BSF) kiba la sdang ban wan kyntur bad pynkylla jaka sah ïa ka shnong Khadphra (18) Mile kaba dei ka jaka kaba la jngai na u khappud jong ka Ri Bangladesh.
Hadien ka jingleit ban ïa kynduh ïa u Deputy Commissioner jong ka South West Khasi Hills District, u Shiningstar Wanniang haba ai jingkren ula ong ba ka jingbuh ktem shipai ki BSF hapoh Shnong Khadphra (18) Mile ha kaba kane kam don jingmut ei ei hynrei ka la long pynban ka jingpynthut ïa ka ïaid ka ïeng jong ki paidbah khasi. “Ki Border Security Force (BSF) ha kum ha kane ki por ba jur ka jingwanrung tuh ki nong Bangladesh sha India ha ka jingshisha ki dei ban don ha ki jaka khappud marjan ban peit pyrman ne ban teh-la-kam ïa ka jingïoh rung lait lan jong ki nongwei ne ki nong Bangladesh”, ong u President ka HNYF.
Namarkata, ka HNYF ka pynpaw ïa ka jingsngewkmen hadien ba u Deputy Commissioner u la kular ba un sa shimkhia ïa kane ka kam bad un sa khot ïa kren ïa ki BSF bad ki Pulit khnang ban lah ban wanrah ïa ka jingshongsuk shongshngaiñ jong ki paidbah.