Shillong, Shillong, 12: U Myntri Rangbah ka Jylla u Conrad K. Sangma, ha ka sngi Baar u la plie ïa ka Block Integrated Development Complex ha Mairang C&RD Block Office, Eastern West Khasi Hills District, bad plie ruh ïa ki jaka ai jingsumar ha Tirot Sing Memorial Hospital, Mairang.
Kine ki kynthup ïa ka Sick New Born Care Unit (SNCU), ka Paediatric Intensive Care Unit (PICU), ka Adult Intensive Care Unit (AICU), bad ka High Dependency Unit (HDU) ïa kiba la shna khnang ban ai jingsumar ïa ki nongpang na ka thaiñ ha kaba kim donkam shuh ban leit wad ïa ki jingsumar sha ki jaka kiba jngai.
Ïa ka Block Integrated Development Complex la plie da u Traditional Artist bad North East Young Talent Artistes Awardee u Marborsing Marbaniang ryngkat ka jingsakhi lang jong u Myntri Rangbah Conrad K. Sangma, ki Myntri Sorkar ba kynthup ïa u Abu Taher Mondal, ka Dr. Mazel Ampareen Lyngdoh, Bah Shakliar Warjri, u Chairman jong ka State Planning Board Bah Metbah Lyngdoh uba long ruh u MLA jong ka Mairang, u Secretary & Director, C&RD Department Sibhi Chakravarthy Sadhu, ka Deputy Commissioner jong ka Eastern West Khasi Hills District ka Kong Anita Kharpor, ka Block Development Officer jong ka Mairang C&RD Block ka Dr. Laureate R. Hynniewta bad kiwei kiwei.
Haba kren kum u kongsan, u Myntri Rangbah u la ong ba ka jingangnud jong ka Sorkar ka long ban pynpoi ïa ki lad jingshakri kaba kham jan sha ki paidbah khnang ban pynthikna ïa ka jingïoh jingmyntoi jong ki paidbah ha kylleng ki district.
U la kdew ba kine ki jingthmu ki long shi bynta ban pynbha ïa ka jingshakri paidbah, ban pynbha ïa ki lad jingsumar, bad ban kyntiew ïa ki kam pynroi kiba ïahap ha ka imlang sahlang. U la kdew ruh ïa ki jingbei tyngka ba kongsan ha ki hynriew snem ba ladep bad ka jingpynbna ruh ïa ki jingthmu na ka bynta ka ophis DC ba thymmai ha Mairang, ka District Convention Centre, ka jingpynbha ïa ki bording ha surok, ka Shillong Secretariat Project ha Mawdiangdiang, ka jingkyrshan ïa ki jaka tynrai kum ka Hima Nongklaw bad ki lad ki lynti ha ka kam jngohkai pyrthei lyngba CM Elevate bad ka jingpyniar ïa ka PMAY (Awas Plus) ban kynthup ïa ki 2.8 lak ngut ki nongïoh jingmyntoi.
U Abu Taher Mondal u la kren halor ka jingdonkam jong ka jingsynshar lang ha kaba pynurlong ïa kine ki jingjop katba u Bah Shakliar Warjri u la ban jur halor ka roi ka par kaba kyntiew ïa baroh ar ki jingmih kiba ïadei bad ka koit ka khiah bad ki samla.
Ha kajuh ka por, ka Dr. Mazel Ampareen Lyngdoh ka la ïaroh ïa ki sienjam ba la wanrah jingkylla ha ka liang ka koit ka khiah bad ka la ïaroh ïa ka kynhun ki nongsumar na ka bynta ka jingshimkhia jong ki. Ka la ong ba kane ka sngi kam dei tang ka jingplie ïa ki jaka sumar hynrei ka dei ka jingbteng ïa ka jingthmu na ka bynta ka jingsumar kaba lah ban ïoh ha kylleng ka Megha laya.
U Bah Metbah Lyngdoh u la pynkynmaw halor ka jingthaw ïa ka district bad u la kren ruh na ka bynta ban pynbha ïa ki jingtei, kynthup ban pynbha ïa ki surok bad kiwei kiwei.
Ka Dr. Kharsahnoh ka la kdew ba ki jaka sumar ba kyrpang ba la tei thymmai kin pynkhlaiñ ïa ki jingshakri ha ka koit ka khiah jong ki khyllung ba dang kha bad kiba la san ha ka distrik, kaba ïarap ban pynduna ïa ka jingïap jong ki khyllung bad ki longkmie bad ban pynbha ïa ka jinglong jingman jong ki nongpang.
Ka la banjur ba ki jaka sumar kin pynduna ïa ka jingdonkam jong ki nongpang ban leit sha ki jaka ba jngai ban ïoh jingsumar, kan pynduna ïa ka jinglut jingsep bad kan pynlong ïa ka jingsumar ba kyrpang kaba kham suk ïa ki nongshong shnong bad kumjuh ruh ïa kito kiba don ha ki distrik ba marjan.
Ka Block Integrated Development Complex kan kyntiew ïa ka jingtreikam ha ka liang ka synshar ka khadar, katba ki jaka sumar ba thymmai, ka SNCU, PICU, AICU, bad HDU ki dei kiba la pyndait ruh ïa ki kor ki bor kiba thymmai kiba don ruh ïa ki nongtrei kiba la ïoh ka jingshah hikai pyntbit kaba pynlong ïa ka jingsumar pang ka ban pynmyntoi ïa ki nongshong shnong jong ka thaiñ Eastern West Khasi Hills bad ki district ba marjan.
