Shillong, Nailar 09: Ka seng United Democratic Party (UDP) ha ka sngi saitjaiñ ka la pynrem jur ïa ka jingshah ktah kti jong ki Lyngdoh ka Balang Katholik bad kumjuh ruh ka jingshah kynnoh ba pynkylla niam jubor ïa ki sister kaba la jia ha Odisha, Jaleswar, ha kaba ïa kane la kynnoh ba la leh da ka seng ki shit niam Bajrang Dal.
Na ka liang ka seng ka la ong ba kane ka jingleh bad ka jingkynnoh ba pynkylla niam jubor ka dei ka kam kaba ktah bad kaba pyni ruh ba kum kine ki kam ki la nang ïai jia ha ka ri baroh ha kaba kum kine ki kam thombor ki dei ki kam kiba ym lah satia ban shah.
“Ngi dawa ba dei ban shim kam mardor pyrshah ïa kiba leh ïa kane ka kam, khlem da kheiñ la ki don na kano kano ka seng bad ba dei ban pynthikna ïa ki lad jingïada ïa ki Lyngdoh, ki sister bad ki jaka pule ki kynhun Christian, khamtam eh ha ki jaka bad ki jylla kiba don kane ka jingma. Ka sorkar India bad ka sorkar jylla na Odisha ki dei ban shim ïa ki sienjam kiba kongsan ban ïada na kum kine ki jingjia bad ban pynneh ruh ïa ka hok ban mane laitluid, khamtam ïa ki rit paid ka ri,” ong u general secretary ka UDP u Bah Titosstarwell Chyne ha ka kyrwoh khubor.
U la ong ruh ba ka seng UDP ka ïenglang bad kine ki lanot bad ka ïing ka sem jong ki, bad ka duwai ruh ba kin ïoh ka jingkoit jingkhiah kaba kloi bad pynthikna ruh ba ka shong suk shongsaiñ kan wanphai biang ha ka ri.
