Nongpoh, Nailar 08: Kum shi bynta ban kynmaw burom ïa uwei na u riewkhraw katei ka thaiñ Western Ri Bhoi u Liar Sirdar, uba la don bynta ban kyntiew ïa katei ka dong ka thain ha ka imlang ka sahlang bad ruh wat ha ka jingim ba kynja mynsiem kum u Pastor uba la shakri ïa ka kam ka jong u Blei, ka Mawdem Academic School Organization ka la pynlong ïa ka 1st Liar Sirdar Mawdem Marathon ban ai burom ïa utei u nongïalam ba khraw ka thain.
Ïa kane ka 1st Liar Sirdar Mawdem Marathon la wan ban plie paidbah da u President ka HNYF Northern Region, u Bah Hesting Lyngdoh bad la wan ban pynhap pyrda da u MLA ka Jirang U Bah Sosthenes Sohtun ha ryngkat ka jingdon lang u Vice President ka HNYF Sengkmie u Bah Barna Manih, ki nongïalam shnong bad ki paidbah nongshong shnong ka thain Mawdem.
Kane ka jingpynlong ïa kane ka jingïamareh marathon ka long ym tang ban kynmmaw burom ïa utei u riewkhraw ne u nongïalam ka thain halor ki kam babha jong u, hynrei la ai ruh halor ka phang ‘Run For Health, Run for Victory) kaba dei na ka bynta ka jingkoit jingkhiah bad ka jingjop ha ka jingim.
La sam ruh ïa ki khusnam sha ki nongjop ha kane ka jingïamareh marathon ha kaba ka kyrdan kiba la heh ka rta ïa ka nam jop ba nyngkong la rah da ka Kong Teiribiang Diya 48 snem bad na ka liang ki shynrang la rah da u Ratiland Nongrum 41 snem ka rta bad u Twas Syngkli, 58 snem ka rta.
Ha ka nam jop jong kiba rit tam na ki kynthei la rah da ka Sanisha Diya bad kiba heh ka rta pat la rah da ka Riba Syngkli na Patharkhmahm bud sa ka Barimon Lapang na Mawdem ha ka kyrdan baar bad ka Samla Maratha Syngkli na Mawdem ha ka kyrdan balai. Naki khynnah shynrang ba la kham heh la jop da u Koberlin Doloi na Warmawsaw, bud sa u Vincent Diay na Warmawsaw bad u Fedinand Rani na Umkynsier. Na ki khynnah rit la jop da u Remember Tron na Mawdem, bud sa u Allexius Makri na Warmawsaw bad u Pyndep Syngkli na Nongrilong bad ha ka kyrdan ki khynnah rit la rah ïa ka nam jop da ka Batemon wahlang ( Mawdem), bud sa ka Wanshonglang Patho( Mawdem) bad ka Rideisuk Diya(Mawdem) ha ka kyrdan kaba lai.
Na ka Liang ka kur Patho ka la ai ïa ka jingïaroh ïa ka Mawdem Academic School Organization kaba la pynlong ïa kane ka jingïamareh marathon na ka bynta kynmaw burom ïa u Liar Sirdar Mawdem bad halor ki kam ba bha ba u la leh na ka bynta ka imlang ka sahlang.
