Mar ïa phet u Bah HDR, wan phai biang ki heh barim sha ka seng Congress

Shillong, Jylliew 25 : Ka Congress Sohiong ha ka sngi Saitjaiñ ka la ïoh ban pynskhem da ki nongkitkam kiba thymmai ban pynkhreh na ka bynta ka elekshon MLA hadien ka jingmihnoh jong u Bah HDR Lyngdoh ryngkat ka kynhun na ka party ban leit ïasoh sha ka UDP.
Ïa kitei ki nongkitkam ba thymmai jong ka party la pynskhem da u Vice President jong ka Meghalaya Pradesh Congress Committee, Bah Boldness L Nongum ha ka jingïalang kaba long ha Mawmaram. Ha kane ka sngi da ki spah ngut ki nongïalam barim jong ka Congress ki la wanphai biang sha ka party hadien ba ki la don shabar jong ka party na kiba bun ki daw.
Ki nongkitkam ba thymmai jong ka Sohiong Block Congress ki kynthup ïa u Bah Badonbor Mawlong kum u President bad Bah Hambert Thangkhiew kum u General Secretary nalor kiwei kiwei ki nongkitkam.
Haba kren bad ki lad pathai khubor hadien ka jingïalang, u Vice President ka MPCC u la ïathuh ruh ba da ka jingpynskhem ïa katei ka kynhun ba thymmai, mynta ka Congress ha Sohiong kan ïoh pat ban pynkhreh shaid shaid ha kine ki khyndiat bnai ban wan na ka bynta ka elekshon kaban sa long ha u 2023.
U General Secretary ka party pat u la ïathuh ba ka jingmih jong ki ha kane ka sngi lehse kan pynkyndit bad pynlyngoh ïa ki nongshong shnong jong ka Sohiong constituency. “Kum ka jingïohi jongngi naduh ka 04tarik Jylliew ba u Bah HDR Lyngdoh u leit ban pynïasoh noh sha ka UDP, ha kato ka sngi tang hapoh ar kynta kam shym la thylli satia namar na ka liang u President ka MPCC, Bah Vincent H Pala u la ai ka shithi ha u Bah Badonbor ban long kum u Adhoc President,” u la ïathuh.
Shuh shuh u ong ruh ba dei da ka jingresaiñ jong u Bah HDR ba ki la ïoh biang ïa ka lad ban lum ban lang ïa baroh ki nongïalam barim jong ka Congress. U ong ruh ba naduh kato ka sngi ki la lah ban thaw ïa ka kynhun ba thymmai jong ka party hynrei namar ki hap ban ïaid katkum ki kyndon kumta ka shimpor haduh katei ka sngi.
“Mynta ka sngi ngim shym la khot bun hynrei ngi khot shwa tang ïa ki nongïalam barim jong ka Congress namar ngi burom ïa ki bad ngim kwah satia ban shu leh klet ïa ki,” u la ong da kaba bynrap ba dei da ka jingdonlang jong ki, ba la lah ban pynlong ïa ka jingïalang ha katei ka sngi kaba jop.