Ki don ki bor na lyndet kiba donkti ha ka kam khaïi beaiñ ïa u dewïong ha jylla: Mukul

Shillong, Naitung, 31: U nongïalam ka liang pyrshah u Mukul Sangma ha ka sngi Palei u la kynnoh ba ki don ki bor ba na lyndet kiba donkti ha ka kam khaïi beaiñ ïa u dewïong ka don ka lynti treikam kaba thmu ban leh, kaba lam sha ka jingslem ki jingtohkit bad kaba la wanrah ïa ka jinglong jingman haba ïa ki sakhi ym lah ban wanrah hakhmat.
U la ong ba kane ka lad bad ka lynti ban treikam ne modus operandi kam dei ka kam kaba thymmai bad la dep ban ïohi ha ki kam ba la dep mynshwa.
Haba kren sha ki lad pathai khubor, u Sangma u la ong ba ka long kaba donkam bha ban lum bad ban pynpaw ïa ki sakhi halor kane ka kam khaïi beaiñ ïa u dewïong.
U la ai jingmut ba ki bor ba dei khmih ki dei ban pynshisha ïa ka jingdon u dewïong ha ki depot bad ban pynlong ka jingpynshisha da ka met ïa u dewïong ba la dep ban die.
Katkum ka jingong jong u, ka jingduna ka jingtieng ïa ka aiñ hapdeng kito kiba donkti ha kane ka kam ba beaiñ kadei ka kam kaba don jingma bha.
Haba buh ka jingkylli ïa ka jingdon bynta ki bor ba dei peit ban ailad ïa ki kam khaïi beaiñ ïa u dewïong ba kan ïaibteng u Sangma u la kynnoh da kaba ong, “Ki lah ban don katto katne ki bor kiba ailad ïa kine ki kam bad ka jingbym shim kam jong ki ka long kumba ailad ïa kine ki kam ba kin bteng khlem da shah pynshitom.”
U la ai jingmut ba ïa kine ki kam ba ïadei bad ka khaïi beaiñ ïa u dewïong dei ban khmih ne peit da ka High Court ne ka Supreme Court.
U Myntri Rangbah barim u la banjur ba ka jingkharoi kine ki kam beaiñ kam neh ne sah tang ha Meghalaya marwei hynrei ka la ïaid shabar u pud u sam ka jylla.
U Sangma u la kdew ruh ba ka pisa kaba mih na kane ka kam khaïi beaiñ ïa u dewïong ka pynmih lang ruh ïa ki kam runar bad kumta dei ban bishar da ki kyndon ka Prevention of Money Laundering Act (PMLA). U la pynpaw ruh ïa ka jingdonkam ban don bynta lang da ka Enforcement Directorate (ED) ban tohkit ïa kine ki kam beaiñ.
U Sangma u la banjur ïa ka jingdonkam ka jingkitkhlieh ka sorkar ban shim ïa kine ki kam khaïi beaiñ ïa u dewïong ba kin ïaid katkum ki kyndon aiñ kiba long na ka bynta ban ïada ïa ka bha ka miat jong ka jylla bad ki nongshong shnong jong ka. U la buh ka jingkylli halor ka jingthmu jong ki briew kiba don ha ka bor lada kim lah ban shim kam.
“Ka donkam ïa ki bor ba dei khmih ban shim kam ne pynshitom ïa kito kiba donkti ha kine ki kam bad ban pynthikna ïa ki jingpyntreikam ka aiñ,” u la bynrap.